Ի՞նչ սպասել ադրբեջանական դատարաններից հայ ռազմագերիների հարցով առաջիկայում սկսվող դատական գործընթացներից. հաշվի առելով նախորդ տարիների փորձը՝կարող ենք փաստել, որ արդար դատաքննության իրավունքի տարրական երաշխիքներ չեն ապահովվի, «Բաքվում պահվող հայ գերիների ճակատագիրն ադրբեջանական դատարաններում» թեմայով քննարկման ժամանակ այս մասին ասաց «Իրավունքների պաշտպանություն առանց սահմանների» ՀԿ-ի իրավական հարցերով փորձագետ Աննա Մելիքյանը։
«Մինչ օրս գրեթե բոլոր հայ ռազմագերիներն օգտվել են Ադրբեջանի հանրային պաշտպանի ծառայություններից, իսկ Ադրբեջանի հանրային պաշտպանի գրասենյակը, միջազգային գնահատականներով, անարդյունավետ է և որևէ պաշտպանություն իրականում չի ապահովվում. բոլոր այն անձինք, որոնք օգտվել են այդ ինստիտուտից, զրկված են եղել արդյունավետ պաշտպանությունից։
Արձանագրել ենք, որ պաշտպանյալները հնարավորություն չեն ունեցել ի պաշտպանություն իրենց՝ վկաներ հրավիրել, հարցաքննել,այլ ապացույցներ ներկայացնել։ Դատավարություններն ընթացել են միայն մեղադրական կողմի ապացույցների հիման վրա։
Բազմիցս եղել է թարգմանության խնդիր, նկատել ենք, որ որոշ դեպքերում թարգմանիչն ապակեպատ տարածքից դուրս է եղել, և թարգմանությունը հազիվհազ է լսվել, որոշ դեպքերում թարգմանությունը եղել է անորակ»,- ասաց Աննա Մելիքյանը։
Բանախոսն ընդգծեց՝ Բաքվի բանտերում պահվող հայ ռազմագերիներին առաջադրված մեղադրանքները քաղաքական բնույթ են կրում՝ ահաբեկչություն և նմանատիպ այլ մեղադրանքներ։
