Մարդիկ սխալ են հասկացել. մենք գրել ենք, որ Facebook-ն ընդհանրապես արգելափակել է շրջանակները։ Եթե լինի շրջանակ, որտեղ թեկուզ գրված լինի՝ «Կեցցե՛ Ֆրանսիան» կամ «Կեցցե՛ ԱՄՆ», էլի արգելափակվելու է։ Azg.am-ի թղթակցի հետ զրույցում այս մասին ասաց Հայոց ցեղասպանության թանգարան-ինստիտուտի տնօրեն Հարություն Մարությանը՝ անդրադառնալով իրենց կողմից ավելի վաղ տարածած հաղորդագրությանը, որ թանգարան-ինստիտուտն այս տարի ևս ֆեյսբուքյան օգտատերերի գլխավոր նկարների համար պատրաստել է «Հիշում եմ և պահանջում» կարգախոսով հուշային շրջանակներ, սակայն Facebook-ն արգելափակել է շրջանակների պատրաստման հնարավորությունը։
«Խնդիրն կոնկրետ էֆեկտի մասին չէ. խնդիրն ընդհանրապես էֆեկտով շրջանակների մասին է։ Եթե մուտք գործեք Facebook frame studio և տեսնեք՝ այնտեղ ինչ է պահանջվում, ամեն ինչ պարզ կլինի։ Մուտք գործելիս Facebook-ը պատասխանում է, որ տվյալ գործողությունը՝ այն է՝ շրջանակ պատրաստելն, անթույլատրելի է»,- ասաց Հարություն Մարությանը։
Դիտարկմանը, որ իրենց կողմից տարածածված հաղորդագրությունից պարզ չի դառնում, որ Facebook-ն արգելել է առհասարակ բոլոր տեսակի շրջանակների պատրաստումը, այլ ոչ միայն Հայոց ցեղասպանության թեմայով պատրաստվածը, մեր զրուցակիցը նշեց.
«Ես հիմա նստած տեքստը խմբագրում եմ։ Շատ էլ հասկանալի տեքստ է։ Անցյալ տարի էլ դրված էր բացարձակապես նույն տեքստը»,- ասաց Մարությանը՝ հասարակությանը հորդորելով «Հիշում եմ և պահանջում» կարգախոսով հուշային շրջանակներին Photoshop ծրագրի միջոցով ավելացնել իրենց լուսանկարը և այդ կերպ տարածել դրանք:
