Azg.am-ի զրուցակիցն է իրավապաշտպան, «Հայաստանի հելսինկյան կոմիտե» իրավապաշտպան հ/կ նախագահ Ավետիք Իշխանյանը։
-Պարո՛ն Իշխանյան, հայտնի է, որ ֆեյսբուքյան գրառումներից մեկի համար Ձեր նկատմամբ քրեական հետապնդում է հարուցվել։ Գրառման տեքստում, մասնավորապես, կարծիք եք հայտնել, որ չի բացառվում՝ ինչպես 2020 թվականի, այնպես էլ սեպտեմբերի 19-ի պատերազմը, պայմանավորվածություն են եղել։ Սպասելի էր արդյոք Ձեր նկատմամբ այս քայլը գործող իշխանությունների կողմից։
– Հայաստանում չի գործում որևէ օրենք։ Ողջ, այսպես կոչված իրավական համակարգը ենթարկվում է մեկ մարդու, ով արդեն ավելի քան հինգ տարի զավթել է վարչապետի աթոռը։ Այդ նա է հրահանգում իրեն ենթակա կառույցներին՝ քննչական կոմիտե, ԱԱԾ, հակակոռուպցիոն չգիտեմ՝ ինչ, դատախազություն, գործեր հարուցել ու կալանավորել իրեն քննադատողներին։
Իսկ ես, արդեն սկսած 2018 թվականի վերջերից, մշտապես խստորեն քննադատել եմ վարչապետ կոչեցյալին՝ հատկապես 2020 թվականի պայմանավորված պարտությունից հետո։ Այնպես որ, մեղադրանքի հարուցումը ոչ միայն սպասելի էր, այլև ուշացած։
-Պարո՛ն Իշխանյան, ինչի՞ մասին է խոսում ռեժիմի նման գործելաոճը։
– Հակիրճ պատասխանեմ՝ բռնապետական, տոտալիտար մտածողություն , ինչպես նաև վախի ու սարսափի զգացում։
– Ըստ Ձեզ՝ ո՞րն է Ձեր նկատմամբ քրեական հետապնդում սկսելու բուն նպատակը՝ զուտ լռեցնելու ընդդիմադիր կեցվածք ունեցող իրավապատպաններից մեկին, թե ընդհուպ անազատության դատապրտելու Ձեզ։
-Ամեն ինչ հնարավոր է։ Եթե վարչապետ կոչեցյալը պատրաստ է կալանավորել պատերազմում զոհված տղաների ծնողներին, արցախցի տեղահանված անչափահասին, երիտասարդ կնոջը, ապա սա ցույց է տալիս, որ նա չունի կարմիր գծեր և պատրաստ է զոհել բոլորին, այդ թվում՝ հայրենիքը՝ հանուն իր իշխանության։
-Պարո՛ն Իշխանյան, որո՞նք են լինելու Ձեր հետագա քայլերը՝ պատրաստվո՞ւմ եք դիմել միջազգային իրավապաշտպան կառույցներին, Հայաստանում հավատարմագրված դեսպաններին։
-Նախ, ոչ միայն չեմ ընդունելու այդ ծիծաղելի մեղադրանքը, այլև շարւնակելու եմ շատ ավելի խստորեն քննադատել, ձաղկել դավաճանական իշխանությանը։
Ես ունեմ իմ սկզբունքները՝ ինձ համար երբևէ չհայցել որևէ կառույցի պաշտպանությունը։ Բացի այդ՝ կարծում եմ, որ ինձ մեղադրանք առաջադրելու առիթ հանդիսացավ իմ բաց նամակն ուղղված արևմտյան երկրների դեսպաններին։
Հիշեցնենք, որ փաստաբան Ռուբեն Մելիքյանն իր ֆեյսբուքյան էջում այսօր գրել էր.
«Իրավապաշտպան Ավետիք Իշխանյանի նկատմամբ քրեական հետապնդում է հարուցվել ներքևում նշված գրառման համար․ ամոթ, հազար ամոթ։
ՀԳ. Շատ տրամաբանական է, որ ռեժիմը թիրախավորել է Հայաստանի թիվ մեկ իրավապաշտպանին։ Դեպի բռնապետություն գահավիժող երկրում դա պարզապես անխուսափելի էր»։
Ռուբեն Մելիքյանը ներկայացրել էր Ավետիք Իշխանյանի ֆեյսբուքան այն գրառումը, որի համար վերջինիս նկատմամբ քրեական հետապնդում է հարուցվել։
«ՄԱ՛Հ ԴԱՎԱՃԱՆՆԵՐԻՆ
Չի բացառվում, որ ինչպես 2020թ․, այնպես էլ այսօր սկսված պատերազմը պայմանավորված էր։ Այն ինչ մինչև վերջ չհաջողվեց 2020թ․, այն է՝ Արցախի ամբողջական հանձնումը, փորձ է կատարվում իրականացնել այժմ։ Սրան նախորդեցին վարչապետ կոչեցյալ դավաճանի հակառուսական հայտարարությունները,ԵՄ կոչվող դիտորդները, հայ-ամերիկյան զորավարժությունները, որոնք հիանալի հող ստեղծեցին ադրբեջանական հարձակման համար։
Ադրբեջանը շտապում է, քանի որ իր դրածո դավաճանի աթոռը երերում է։
Միևնույնն է, ի հեճուկս դավաճանների, Արցախը մնալու է կանգուն։
Մա՛հ դավաճաններին»։
