Ազգային ժողովի խոսնակը խառնում է երկու տարբեր հասկացություն՝ ժողովրդավարությունն ու ինքնավարությունը։ Եվ թեեւ դրանցից որեւէ մեկը չկա մեր երկրում, Ալեն Սիմոնյանը պնդում է՝ Մոսկվան Հայաստանի ներքին կյանքին եւ գործերին չի խառնվում։
2018 թ. մայիսի 14 Սոչի։ Նիկոլ Փաշինյանի՝ վարչապետի պաշտոնը ստանձնելուց հետո պաշտոնական այցով առաջինը մեկնում է Ռուսաստանի Դաշնությունը։ Նույնը նաեւ 2018-ի դեկտեմբրյան խորհրդարանական արտահերթ ընտրություններում հաղթանակ տանլուց հետո՝ դեկտեմբերի 27-ին, պաշտոնական առաջին այցով կրկին մեկնում է Ռուսաստան՝ Մոսկվա։ Քաղաքական գործընթացներում ընդունված բան է՝ փոքր երկրի նորընտիր առաջնորդի պաշտոնական առաջին այցն արտերկիր ցույց է տալիս, թե ով է նրա մեծ եղբայրը։
Մինչդեռ հայրենի իշխանությունն այսօր ջանք ու եռանդ չի խնայում ինչ-որ պատրանք ստեղծելու համար, թե պատրաստվում են արտաքին քաղաքական վեկտոր փոխել կամ ՀԱՊԿ-ից դուրս գալ և այլն, Հայաստանի գլխավոր օդանավակայանի՝ Զվարթնոցի անցագրային ծառայությունն այս պահին էլ շարունակում են իրականացնել ռուսները։ Ռազմավարական դաշնակցինն է նաեւ հայ-թուրքական սահմանը, որ վերահսկում է Գյումրիում տեղակայված 102-րդ ռազմաբազան։
Իհարկե, Մոսկվան իրենց՝ ՔՊ-ականներին, ոչինչ չի կարող ասել, բայց, օրինակ, մի քանի ժամով կարող է փակել գազի փականը, անջատել ատոմակայանի էներգաբլոկներն ու Հայաստանը կտրել համաշխարհային երկաթուղային ցանցից։ Դեռ չասած՝ Հայաստանին օդի պես անհարժեշտ ցորենից կտրել։
