Հայ Առաքելական եկեղեցու և հոգևորականների դեմ այսօր շարուակվող հետապնդումները քաղաքական սցենարի մի արարն են: Այսօր լրագրողների հետ զրույցում նման տեսակետ հայտնեց նախկին ՄԻՊ, «Միասնության թևեր» քաղաքական նախաձեռնության ղեկավար Արման Թաթոյանը՝ անդրադառնալով Արագածոտնի թեմի առաջնորդին, մի շարք հոգևորականների և քաղաքացիական անձանց ձերբակալության փաստին։
«Ակնհայտ է՝ Փաշինյանն իր վրա է վերցրել դատարանի, դատախազի, քննիչի լիազորություններ և հենց այդ տրամաբանությամբ էլ գործում է՝ քաղաքական հրահանգներով։ Ես մի քանի անգամ ասել եմ՝ եկեղեցու նկատմամբ նրա գործությունությունն այլևս քրիստոնեության պաշտպանության հարց է։
Ինքն իրեն անընդհատ դիրքավորում է որպես Հայ եկեղեցու հետևորդ, բայց չի կարող մի մարդ քրիստոնյա կոչվել, որն անընդհատ ատելություն է սերմանում, մարդկանց թշնամացնում է։ Եկեղեցիները փակել են, խուզարկում են, սրանք չլսված բաներ են։ Սրանով իրավապահ մարմնները հեղինակազրկվում են հանրության աչքում, մեր արժեքներն ամբողջովին ավերվում են»,- ասաց Թաթոյանը։
Այն, որ փաստաբանն իր հոգևորական պաշտպանյալի տեղը չգիտի, Արման Թաթոյանի խոսքով՝ ոչ այլ ինչ է, քան ռեպրեսիա։
«Տեսեք, այս գործողություններն ամեն անգամ շատ սիրուն համընկնում են ադրբեջանական իշխանությունների, հոգևոր առաջնորդի հայտարարությունների հետ։ Դուք նայեք իրենց բառերը՝մեկին մեկ համընկնում են։ Ինչքան էլ հերքեն, փաստերն այլ բանի մասին են խոսում։ Սա ծրագրված, հստակ քաղաքականություն է, որին մաս են դարձնում իրավապահ համակարգին։ Այս ամենը ՀՀ միջազգային վարկանիշը լրջորեն վնասող հարց է։ Այս ռեպրեսիաներն օրինակ են, թե ինչի է բերում անձնիշխանությունը և կուսակցապետությունը։ Սա ուղիղ հարված է Հայաստանի իմիջին, դրա համար պետք է վերացնել անձնիշխանությունը»,- ասաց Արման Թաթոյանը։
