Հանրային կառավարման մասնագետ Հովհաննես Ավետիսյանն իր ֆեյսբուքյան տեսաուղերձում անդրադարձել է այն հարցին, թե ինչու է անհրաժեշտ իշխանափոխություն իրականացնել՝ ազատվելով ներկա վարչակազմից։
«Ես չեմ ուզում, որ մեր ժողովուրդը կենտրոնանա պետական պարտքի վրա և ասի՝ «Փաշինյանի իշխանությունը պետք է հեռանա, քանի որ պետական պարտքը կրկնակի անգամ շատացրել է՝ 14 միլիարդ 600 միլիոն է արդեն դարձել։ Ես չեմ ուզի, որ ժողովուրդը կենտրոնանա ասֆալտի և մյուս բաների վրա և ասի, որ Փաշինյանի իշխանությունը դրանց համար պետք է հեռանա։
Ո՛չ, Փաշինյանի իշխանությունը պետք է հեռանա, որովհետև նա ուրացել է հայ ժողովրդի զրկանքները, պայքարը, հանձնել է Արցախը, պատրաստվում է նոր տարածքներ զիջել թշնամուն, պատրաստվում է Ալիևի հրահագով փոխել Սահմանադրության կետեր, որը մեր պետականության նսեմացում է, շարունակաբար զիջում է հայկական շահը և չի սպասարկում հայկական շահերը։ Սրա համար պետք է Փաշինյանին հեռացնել, այլ ոչ թե այն բանի համար, որ պետական պարտք է շատացրել, լավ ասֆալտ չի արել և այլն։
Այդ ամենն ինչքան կարևոր է, բայց ավելի կարևոր է այն, որ նա իր անպատասխանատվության, իր քաղաքականության հետևանքով տարավ, 5 հազարից ավելի մարդու գլուխը կերավ, հետևից էլ Արցախը զիջեց՝ ճանաչելով Ադրբեջանի մաս։ Հիմա էլ դրած պարտքերն ու մյուս բաներն ենք քննարկում։
Ես, լինելով պետական ֆինանսների մասնագետ, չեմ ուզում այս դիսկուրսի մեջ մտնել, բայց նաև չեմ ուզում, որ մարդիկ խաբված լինեն։ Ես ուզում եմ, որ հայ ժողովուրդը չշեղվի իրական և կարևոր օրակարգից. իրական և կարևոր օրակարգը մեր ազգային շահերն են, ոչ թե պարտքի մեծությունը կամ ասֆալտն ու մյուսը»,- ասաց Հովհաննես Ավետիսյանը։
