Երևանում 700 ավտոբուսներից գիծ է դուրս գալիս 400-450-ը։ Հարց է՝ ինչո՞ւ շարժակազմի զգալի մասը երթուղի դուրս չի գալիս, որոնց թիվը 45 է։
Երևանի քաղաքապետարանի տրանսպորտային «բարեփոխումների» պատճառներն ու հետևանքները վերլուծում է «Հայաքվե» նախաձեռնության ներկայացուցիչ, տնտեսագետ Հրայր Կամենդատյանը։
Վերգետնյա տրանսպորտից օգտվում է տարեկան 70-75 միլիոն ուղևոր։
Երևանի մետրոպոլիտենն էլ ունի խնդիր՝ կապված շարժակազմի հետ։ Երթուղի է դուրս գալիս 35 վագոն, որը պահանջարկի 75 տոկոսն է միայն։
Մետրոպոլիտենը տարեկան տեղափոխում է 20-22 միլիոն ուղևորի. սա 2022 թվականի տվյալ է, բայց դրանից հետո Երևանի բնակչությունն ավելացել է, իսկ մետրոյի վագոնները՝ ոչ։
Հրայր Կամենդատյանն ուղղակի արձանագրում է՝ Երևանի քաղաքապետարանում տրանսպորտի հարցերով զբաղվում են այնպիսի չինովնիկներ, որոնք այս ոլորտի հետ կապ չունեն, մասնագետ չեն, փորձառություն չունեն, դրա համար էլ ցանկացած նախաձեռնություն տապալվում է, կոլապսի առաջ կանգնում։
Նոյեմբերի 1-ից ավտոբուս կարելի է նստել միայն 100 դարամանոցով կամ QR կոդով։
Քաղաքային իշխանությունները այս «բարեփոխմամբ» իբր պայքարում են ստվերի դեմ։
Նրանք տվյալներ էին հրապարակել, ըստ որոնց՝ վերգետնյա տրանսպորտով օրական երթևեկում է 600 հազար մարդ, բայց օրական հավաքագրվում է 30 միլիոն դրամ՝ 60 միլիոնի փոխարեն։
Նոյեմբերի 1-7-ը հավաքագրվել է ընդամենը 213 173 300 ՀՀ դրամ, որից 57 802 200 ՀՀ դրամը էլեկտրոնային վճարումներով։ Ինչքան էլ շեշտեն էլեկտրոնային վճարման թիվը, միևնույն է, ամեն օր չգիտես որտեղ կորչող «ստվերային» 30 միլիոնը չեն կարողանում գտնել։
Իրենց նշած 213 173 300 դրամը եթե բաժանում ենք 7 օրվա վրա, ստացվում է 30 միլիոն, այն մյուս «ստվերային» 30 միլիոնը չկա ու չկա։
Հրայր Կամենդատյանը տեսանյութում պատմում է, որ ինքն ամեն օր օգտվում է հանրային տրանսպորտից և վկայում է, որ ոչ մի վարորդ ոչ մի դրամ չի գրպանում, ուրեմն որտե՞ղ է այն չհավաքագրվող 30 միլիոնը։
Մեկ այլ հարց էլ կա՝ հավաքագրված գումարները մինչև բանկային հաշիվ հասնելը, ինչպիսի՞ ճանապարհ են անցնում։ Կանխիկի մուտքագրումն այլ բան է, այդ մուտքագրված գումարը բանկային պահոց հասնելը՝ այլ բան։
«Իմ կարծիքով՝ ստվերը պետք է փնտրել հավաքակայանից դեպի բանկային հաշիվ գնալու ճանապարհին»,- նկատում է Հրայր Կամենդատյանը։
Մանրամասները՝ տեսանյութում
