Իրենց «շան լակոտներ» ասողին արձագանքողները 2 ամսով կալանավորվում են, իսկ «շան լակոտներ» ասողը հարկատուների հաշվին վայելում է կյանքը, քանի որ ԱԺ նախագահ է

Աջափնյակի դատարանում (դատավոր Ռոման Սմբատյան) քննվել է նոյեմբերի 13-ի առավոտյան իր տնից բերման ենթարկված Վազգեն Սաղաթելյանին կալանավորելու միջնորդությունը։
Ժամը 00։30-ին փաստաբան Արսեն Բաբայանը դուրս եկավ դատարանից և հայտնեց, որ ինչպես և սպասելի էր, դատավորը Վազգեն Սաղաթելյանին 2 ամսով կալանավորելու որոշում հրապարակեց։
Կեսգիշերն անց՝ ժամը 1-ին, Նոր Նորքի դատարանից դուրս եկավ իրավապաշտպան Ռուբեն Մելիքյանը և հայտնեց, որ դատավոր Մասիս Մելքոնյանը Նարեկ Սամսոնյանին 2 ամսով կալանավորելու որոշում հրապարակեց։
Հիշեցնենք, որ ԱԱԾ դիմակավորված աշխատակիցները նոյեմբերի 13-ին՝ ժամը 07։10-ին, Նարեկ Սամսոնյանին և Վազգեն Սաղաթելյանին իրենց տներից բերման են ենթարկել, խուզարկել բնակարանները, նաև նրանց հիմնադրած «Անտիֆեյք» հարթակի գրասենյակը, առգրավել ամբողջ տեխնիկան, անգամ՝ տեսախցիկները, շտատիվները։ Ձերբակալվել է նաև «Անտիֆեյք»-ի լրագրող Դավիթ Ֆիդանյանը։
Վազգեն Սաղաթելյանը և Նարեկ Սամսոնյանը ձերբակալվել և կալանավորվել են ԱԺ նախագահ Ալեն Սիմոնյանի «հանցագործության մասին հաղորդման» հիման վրա։
Նշենք, որ նույն Ալեն Սիմոնյանը տղաներին անվանել էր «շան լակոտներ», ինչին նրանք արձագանքել էին «Իմնեմնիմի»-ի եթերում, դրան էլ հաջորդել են ձերբակալությունները։