44-օրյա պատերազմում զոհված Ժորա Մարտիրոսյանի մորը՝ Գայանե Հակոբյանին, Արմավիրի ՔԿՀ-ից էին դատարանի դահլիճ ուղեկցել: Չնայած այն հանգամանքին, որ վերաքննիչ դատարանն այսօր առավոտյան էր փոխել տիկին Գայանեի խափանման միջոց կալանքը տնային կալանքով, զոհված զինվորի մայրը հենց դատարանի դահլիճից կրկին կալանավայր տեղափոխվեց. այդպես որոշեց Երևան քաղաքի ընդհանուր իրավասության դատարանի դատավոր Մանվել Շահվերդյանը:
Մոտ 3,5 ժամ կողմերին լսելուց հետո, առանց խորհրդակցական սենյակ հեռանալու, դատավոր Շահվերդյանը տնային կալանքը փոխեց 1 ամիս 15 օր կալանքով:
«Եղեք ազնիվ ամեն մեկդ ձեր գործում, որը չի նկատվում ոչ մի բանի մեջ: Դուք մտածում եք, որ իմ ֆիզիկական տվյալներով էդ մարդուն վնաս կարամ տա՞մ»,- դիմելով դատավորին՝ ասաց տիկին Գայանեն:
Ի պատասխան՝ դատավոր Շահվերդյանը նշեց, որ իր որոշումը իրավական դաշտում է:
«Իմ հոգեվիճակը, կարգավիճակը այլևս թույլ չեն տալիս նման նվաստացումների»,-ասաց զոհվածի մայրը:
Պաշտպանական կողմը դատավոր Մանվել Շահվերդյանին գրավոր բացարկ ներկայացնելու համար ժամանակ խնդրեց:
«Դատարանը, դատախազությունը գտնվում են Նիկոլ Փաշինյանի ազդեցությաւն տակ»,- դատարանում ասաց պաշտպան Հովսեփ Սարգսյանը:
Գայանե Հակոբյանը կարգադրիչներից խնդրեց թույլ տան, որ գոնե գրկի դստերը. թույլ չտվեցին:
«Դուխներդ չգցեք: Աստված մեծ ա: Ժորս վերևից ձեզ հետ ա: Հանկարծ չնեղվես, Սոնա, լսո՞ւմ ես: Չնեղվեք ոչ մեկդ»,- դատարանից հեռանալիս ասաց հերոսի մայրը:
Նշենք, որ այսօր մեկնարկել էին Աշոտ Փաշինյանին իբև առևանգելու գործով նախնական դատալսումները, որոնց ընթացքում քննարկվում էր Գայանե Հակոբյանի խափանման միջոցի հարցը:
Հիշեցնենք, որ Աշոտ Փաշինյան-Գայանե Հակոբյան միջադեպը տեղի էր ունեցել մայիսի 17-ին:
