Կառավարության նիստին հաջորդած ճեպազրույցի ժամանակ լրագրողներն Արդարադատության նախարար Սրբուհի Գալյանից հետաքրքրվեցին՝ իշխանությունն ի՞նչ ունի Արարատ լեռան դեմ, ինչ արշավ է տարվում, որ այդ սիմվոլը հանում են ՀՀ ելքի ու մուտքի կնիքների վրայից՝ այն դեպքում, երբ ունենք Արարատի մարզ, Արարատ անունով քաղաք և վերջապես ԱԳ նախարար Արարատ Միրզոյանը։
«Ո՞նց կարելի է տեխնիկական փոփոխությունը մեկնաբանել որպես արշավ Արարատ լեռան դեմ։ Եթե չեմ սխալվում, էլի են եղել տարիներ, որ Արարատ լեռը չի եղել կնիքների վրա։ Կներեք էլի, քանի՞ անգամ եք ձեր անձնագիրը բացում ու կնիքը նայում, Արարատը ֆիքսում»,- հարց հնչեցրեց նախարարը՝ անդրադառնալով ՀՀ մուտքի կամ ելքի կնիքի վրայից Արարատ լեռան պատկերը հանելու որոշմանը։
Գալյանի համար Արարատը պատմականորեն բիբլիական լեռ է, երբ Զեյթուն համայնքից գալիս է աշխատանքի ու եղանակը պարզ է լինում, իր օրը շատ լավ է սկսում։
«Մենք ապրում ենք մեր պատմական անցյալը չմոռանալու գաղափարով և մեր հայացքով՝ ուղղված դեպի ապագային ու իրականությանը։ Վարչապետի ասածը հետևյալն է. չպետք է մոռանալ անցյալը, պետք է սիրել անցյալը և պետք է արժևորել ու սիրել ներկան, որ այդ ներկան մի օր չդառնա անցյալ»,- նշեց նախարարը։
