ԱԺ-ում լրագրողների հետ ճեպազրույցում Նիկոլ Փաշինյանն անդրադարձել է կարգալույծ քահանաների մատուցած պատարագներին իր մասնակցությանը։ Ասել է՝ պատարագներին մասնակցությունը քաղաքական կամ հանրային ակցիա չէ, այլ հոգևոր ճանապարհ։
«Ես Աստծու հետ իմ հարաբերություններում այլոց աջակցության կարիք չունեմ, որովհետև մենք պատարագի ենք գնում, ես պատարագի եմ գնում, ես չեմ գնում հանրահավաքի։
Ես գնում եմ պատարագի և ուրախ եմ, որ մյուսներն էլ են գնում պատարագի, որովհետև, ինչպես արդեն ասել եմ, դա կարևոր է ինձ համար։ Դա իմ, նաև մեր քաղաքական թիմի այն հատվածի համար է, ովքեր հավատում են Աստծուն։
Ես ընդունում եմ, որ Հայաստանի Հանրապետությունում յուրաքանչյուր ոք ունի խղճի ազատություն․ մարդկանց մի մասը կարող է հավատալ Աստծուն, մյուս մասն՝ ունենալ այլ հայացքներ։ Բայց ինձ համար դա իմ հոգևոր և բարոյական նորոգման ճանապարհն է, և ես ուրախ եմ այն մարդկանց համար, ովքեր գալիս են պատարագի։
Այս պատարագների շարքը շատ կարևոր է, որովհետև, այո՛, ես եմ ձևակերպել և բարձրաձայնել այդ օրակարգը, և հետևողականորեն շարունակելու եմ գնալ այդ ճանապարհով։ Բայց սա մի կենդանի գործընթաց է, որտեղ խոսակցություն է տեղի ունենում՝ հանրության հետ, յուրաքանչյուրի՝ ինքն իր հետ, և Աստծո հետ։
Ինչո՞ւ եմ որոշել մասնակցել պատարագներին․ որովհետև, ինչպես արդեն ասել եմ իմ մի եթերում, կարծում եմ՝ խոսքը մեր սրբության սրբոցի՝ Մայր Աթոռ Սուրբ Էջմիածնի հոգևոր և բարոյական նորոգման մասին է։ Իսկ այդ նորոգման հասնելու և մեր սրբության սրբոց մտնելու ճանապարհին մենք պետք է նախ մաքրվենք։
Եթե ասում ենք, որ ուրիշները արժանի չեն մեր սրբության սրբոցին, ապա պետք է ընդունենք, որ մենք էլ նախ պետք է արժանանանք։ Ահա թե ինչու ենք գնում պատարագի։
Այդ պատճառով եմ ես հաղորդություն ընդունում և շարունակելու եմ ընդունել։ Իհարկե, գնալու եմ Մայր Աթոռ, երբ որ բավարար չափով մաքրված կզգամ ինձ»,-ասաց Փաշինյանը։
