Երևանի ավագանու այսօրվա արտահերթ նիստի օրակարգում մեկ հարց էր՝ նշանակել քաղաքապետի արտահերթ ընտրության օրը։
Դժվար է ասել՝ նիստը բացվեց, թե չբացվեց, որովհետև նիստը վարողը ներկա էր, իսկ ենթադրյալ մասնակիցները՝ ոչ։
Դահլիճը դատարկ էր։ Ներկա էին միայն փոխքաղաքապետ, քաղաքապետի պաշտոնակատար Լևոն Հովհաննիսյանն ու ավագանու անդամ Սերգեյ Գյոզալյանը։
Քվորում չկար, Լևոն Հովհաննիսյանը մի քանի րոպե սպասեց՝ իբրև թե մեկ էլ տեսար ավագանին ուշացած գա։ Ավագանին չեկավ, քաղաքապետի պաշտոնակատարը հայտարարեց 30 րոպե ընդմիջում։ Ընդմիջումից հետո էլ ավագանու անսդամները չներկայացան։
Հիշեցնենք, որ ապրիլի 4-ի ավագանու նիստին «Իմ քայլը» խմբակցության ղեկավար Արմեն Գալջյանը հայտարարել էր, որ խմբակցությունը որոշել է նոր քաղաքապետ չընտրել և սպասել ընտրություններին։ «Այս պահի դրությամբ մենք նոր քաղաքապետ չենք ընտրի, հետեւաբար, քաղաքապետի ընտրության օրվա նիստին չենք ներկայանա, որովհետեև թեկնածու չի լինի, քննարկելու և ընտրության անհրաժեշտություն էլ չի լինի»,-նախապես հայտարարել էր նա։
Այդ դեպքում ի՞նչ նպատակ ուներ ավագանու արտահերթ նիստի այս տրագիկոմեդիայի բեմադրությունը, եթե բոլորը գիտեին, որ «Իմ քայլը» չի ներկայանալու նիստին, իսկ մյուս խմբակցություններն իրենց դիրքորոշումներով առանձնապես չեն տարբերվում «Իմ քայլից»։
Ավագանու նիստն «ամբողջ հմայքով»՝ տեսանյութում.
