Գյումրու շուրջօրյա խնամքի կենտրոնը 160 բնակիչ ունի։ Ամեն մեկը միայնակ մնալու իր պատմությունը սրտում ծրարած՝ ապրում է, մտերմություն անում իր բախտակցի հետ, փորձում օրը հետաքրքիր զբաղմունքով լցնել։
Սակայն ոչ մեկին նման չէ Ալբերտ Սարգսյանի՝ Գյումրու խնամքի կենտրոնում հայտնվելու պատմությունը։
90 տարեկան պապիկը Արցախից է բռնագաղթել, Արցախում թողել է 90 տարվա արած-դրածը, տուն ու տեղը, նախնիների գերեզմանները, Արցախում ապրած մի ամբողջ կյանք ու 2023-ի սեպտեմբերի դժնդակ օրերին բռնագաղթել Հայաստան։
Ալբերտ պապը բանաստեղծություններ է գրում, Արցախում ուսուցիչ է եղել։ Բանաստեղծություն է նվիրել նաև ազգային բարերար Սամվել Կարապետյանին։ Ամեն ինչ կորցրած պապը երախտագիտությամբ է լցված. հազարավոր արցախցիների նման ինքը ևս բուժվել է Սամվել Կարապետյանի միջոցներով կառուցված Ստեփանակերտի հիվանդանոցում։ Բարերարին անձամբ չի ճանաչում, բայց սիրտը ցավում է՝ ինչպե՞ս կարելի է բարեգործական մեծ ծրագրեր իրականացրած, ուրիշներին օգնություն ցուցաբերած մարդուն կալանավորել։ Ասում է ու հուզմունքը չի կարողանում զսպել… արտասվում է…
