Վարդաշենի 6-րդ փողոցի 68 ա և 66/1 հասցեների հանրակացարանները վերջնական փլուզման եզրին են, իսկ այնտեղ 200 մարդ է ապրում։ Այնտեղից տղաներ են ճանապարհվում բանակ։
Բնակիչները հազար ու մի հիվանդություն են ստացել խոնավությունից ու հակահիգիենիկ պայմաններից։
2023 թվականի քաղաքապետի ընտրություններին Տիգրան Ավինյանը նախընտրական քարոզարշավին վարդաշենցիներին խոստացել է, անգամ ժամկետներ է նշել, որ նրանց համար նոր շենքներ է կառուցելու։ Շուտով կլրանա 2 տարին, ինչ վարդաշենցիները խաբված են, ու ինչպես իրենք են ասում՝ ֆուտբոլի գնդակի նման քաղաքապետարանն իրենց նետում կառավարություն, այնտեղից էլ՝ քաղաքապետարան։
Կառավարությունը Վարդաշենի հանրակացարանները գերակա շահ է ճանաչել, բայց բանավոր։ Գրավոր որևէ որոշում չկա, ըստ որի՝ սկսվի բնակիչների համար նոր շենքերի կառուցումը։ Վարդաշենցիների համբերության բաժակը լցվել է։ Պատմում են, որ 2 տարի առաջ, երբ Էրեբունիում Քպ-ի նոր գրասենյակ էր բացվում, անձամբ են Փաշինյանին մոտեցել, խնդիրը ներկայացրել։ Նրա օգնականը բոլոր փաստաթղթերի հետ ծանոթացել է, բայց մինչև հիմա ոչ մի գործընթաց չկա։
Վարդաշենցիները պատրաստ են հացադուլ անել, նրանք այսօր Կառավորության հարակից փողոցներն են փակել՝ պատկան մարմիններից պահանջելով ընդունել իրենց ու գրավոր պատասխան տալ՝ երբ են փլուզվող շենքերի փոխարեն ապրելու նորակառույց շենքերում, ե՞րբ են իշխանություններն իրենց խոստումները կատարելու։
