«Պահանջում ենք հանդիպում Նիկոլ Փաշինյանի հետ, պահանջում ենք Սուրեն Պապիկյանի հրաժարականը, որովհետև մտավախություն ունենք, որ նա քննությանը կխոչընդոտի։ Չենք վստահում վարույթ իրականացնող մարմնին, չենք հավատում պաշտոնական վարկածին, թե բենզինով վառարան են վառել, երեխաները հրդեհից են մահացել»,- վրդովված ասացին հունվարի 19-ին, Ազատ գյուղի կացարանում մահացած 15 զինծառայողների հարազատները։
Նրանք Կառավարության շենքի մոտ բողոքի ակցիա են իրականացրել։
Տուժողների շահերի պաշտպան Նորայր Նորիկյանը համարում է, որ ծնողների ցանկացած պահանջ օրինական է, քանի որ նրանք անհասկանալի պայմաններում ու անհասկանալի պատճառներով կորցրել են իրենց երեխաներին։
Ի՞նչ վիճակում են եղել երեխաների դիերը, ո՞վ է նրանց տարել դիահերձարան։ Ի՞նչ է կատարվել դեպքին նախորդող ժամանակահատվածում, ի՞նչ հարաբերություններ են եղել զինվորների ու սպայական կազմի միջև։ Արդյո՞ք վարույթ իրականացնող մարմինը բացառում է դիվերսիայի վարկածը։ Մեկ տարի առաջ, Գեղարքունիքի մարզի այս նույն տարածքում հայ զինվորները թշնամու զինվորների են բռնել, իհարկե, հետո նրանց հանձնել են ադրբեջանցիներին։
Փաստաբանը Պաշտպանության նախարար Սուրեն Պապաիկյանին պաշտոնական գրություն է ներկայացրել. անցել է 11 օր, ո՛չ մի պատասխան չի ստացվել ոչ նրանից, ո՛չ զինդատախազից։
Պաշտոնական, կենսունակ համարվող վարկածից շատ տարբեր վկայություններ են ներկայացվել։ Կապիտանը պատմում է, թե ինքն ու Լյովա անունով մի զինվոր ձայն են տվել տղաներին, որ վեր կենան, հրդեհվող կացարանից փախչեն, բայց նրանք չեն արձագանքել, այնինչ՝ 15-20 րոպե ժամանակ են ունեցել այդտեղից հեռանալու համար։
Այս իրարամերժ վկայությունները, պատմությունները, բնական է, խորացնում են ծնողների կասկածները, որ իրենց զավակների մահվան մեջ անմաքուր, դավադիր պատճառներ կան թաքնված։
Մանրամասները՝ տեսանյութում
