Ադրբեջանական կողմը պաշտոնապես հաստատում է 23 հայ գերիների՝ Բաքվում գտնվելու հանգամանքը։ Ի շնորհիվ Կարմիր խաչի նախկին գործունեության՝ նրանց որպիսությունը հայտնի է, կա ստուգելի տեղեկատվթյուն նրանց ողջ լինելու մասին։ Սակայն սա չի նշանակում, որ ի սկզբանե գերեվարվել են և Բաքվում պահվում է բացառապես 23 հայ, այսօր կայացած քննարկման ժամանակ ասաց Մարդու իրավունքների եվրոպական դատարանում հայ գերիների շահերի ներկայացուցիչ, իրավապաշտպան Սիրանուշ Սահակյանը։
«Ցավոք, եղել են այնպիսի զարգացումներ, որոնք բացահայտում են գերիների սպանություններ, ընդ որում՝ այնպիսի դրվագներով, երբ արդեն իսկ գնդակահարված գերևու մարմինը հանձնվել է հայկական կողմին։ Երկրորդ, գերիներն ուղղակի բռնի անհետացել են։ Գերեվարմանը հաջոդող ժամանակահատվածում մենք կորցրել ենք տեղեկատվությունն այդ անձանց վերաբերյալ։ Ադրբեջանական կողմը հերքում է իր կապը անհետացած գերիների հետ և հրաժարվում է տեղեկատվություն տրամադրել։ Ցավոք սրտի, չկա որևէ անկախ միջազգային կազմակերպություն, որը կկարողանա որոնել և գտնել բռնի անհետացած գերիներին, ստուգել նրանց ողջ լինելը։
Այո՛, ունենք 23 գերիներ Բաքվում և բազմաթիվ բռնի անհետացածներ։ Բազմիցս խոսվում է 80 անձի մասին։ Դրանք հաստատված դեպքերն են։ Առնվազն 80 անձի մասին իրավապահները փաստեր են ներկայացնում, բայց փաստացի այդ թվերը կարող են ավելի լինել։ Այո՛, 23 գերիների թվում են Արցախի ղեկավար կազմից 8 անձ, ինչպես նաև 5 գերի, որոնց գերեվարումը տեղի է ունեցել 2020 թվականին»,- ասաց Սիրանուշ Սահակյանը։
Բանախոսը միաժամանակ հիշեցրեց՝ ԿԽՄԿ-ն Բաքվի բանտերում պահվող հայ գերիներին վերջին անգամ տեսակցել է այս տարվա հունիս ամսին, և այս պահին չկա անկախ միջազգային որևէ կառույց, որը կկարողանա այցելել հայ գերիներին և պարզել նրանց իրական դրությունը։ Առկա տեղեկատվությունը միակողմանի է և ոչ ստուգելի։
«Մենք այս պահին տեղեկատվություն ունենք, որ Խոշտանգումների կանխարգելման կոմիտեն այցելել է Ադրբեջան, և չենք բացառում, որ մեկանգամյա տեսակցություն ունեցած լինի որոշ հայ գերիների հետ»,- ասաց Սահակյանը՝ ձեռնպահ մնալով այլ մանրամասներ հայտնել։
