Երբ շլացնում է ոչ թե շոուն, այլ արտիստը, որի համար շոուն ընդամենը միջավայր է, մթնոլորտ, տրամադրություն։
Հայտնի ղազախ երգիչ Դիմաշ Կուդայբերգենն առաջին անգամ Հայաստանում էր։ Նա ելույթ ունեցավ Կարեն Դեմիրճյանի անվան մարզահամերգային համալիրում։ Stranger ծրագիրն առաջին անգամ էր ներկայացնում օտար երկրում, ու հենց Հայաստանից էլ սկսեց իր շրջագայությունը։
Դիմաշը 28 տարեկան է, թվում է, թե Հայաստանում նրա երկրպագուները պետք է լինեն երիտասարդներն ու պատանիները, բայց զարմանալիորեն նրա կերպարն ու երգերը մեծ մասամբ հավանում է միջին ու ավագ սերունդը։
Մարզահամերգային համալիրում Դիմաշին տեսնելու և լսելու էր եկել ինտելեկտուալ հասարակությունը։ Մեծ դահլիճը լեփ-լեցուն չէր, ցավալիորեն ազատ տեղերը քիչ չէին, բայց, ինչպես հայտնի դարձավ Azg.am-ին, պատճառը տոմսերի բարձր գինն էր։ Ի վերջո, գաղտնիք չէ, որ մեր երկրում որակյալ արվեստը գնահատողներն ունևոր, ապահովված մարդիկ չեն։ Դիմաշի համերգների տոմսերը ոչ մի երկրում էժան չեն, բայց մենեջմենթի նույն տրամաբանությամբ Հայաստանում գործելու սկզբունքը կարելի էր վերանայել։ Եվ այդ դեպքում մարզահամերգային համալիրը շատ ավելի մարդաշատ կլիներ։
Դիմաշի համերգին եկել էին նրա արվեստի իսկական երկրպագուները, նրանք, ովքեր հետևում են երգչի շրջագայություններին, նոր ձայնագրություններին, լավ գիտեն նրա երկացանկը։
Դիմաշի համերգին Վրաստանից Երևան էին եկել նրա երկրպագուները, գնել էին ամենաթանկ տոմսերը, որպեսզի արտիստին տեսնեն շատ մոտիկից՝ առաջին շարքերից, նրա ինքնագիրը վերցնեն, լուսանկարվեն նրա հետ։
Դահլիճը բազմազգ էր։ Դիմաշին լսելու էին եկել լեհեր, ռումինացիներ, ֆրանսիացիներ, ռուսներ, ղազախներ, հրեաներ, վրացիներ. մեծ մասամբ՝ միջին ու ավագ սերնդի կանայք, որոնք հագել էին նրա նկարով շապիկներ, բաճկոններ և անգիր երգում էին նրա երգերը՝ ղազախերեն, անգլերեն, ռուսերե, չինարեն։
Դիմաշը Երևան էր եկել ընտանիքի անդամների հետ, որոնք իր հետ հավասարապես աշխատում են տարբեր նախագծեր կազմելիս ու երգչի նեցուկն են։
Արտիստը 5 անգամ զգեստափոխվեց, լույսեր, հրավառություն, կրակներ, գույներ, փոքրիկ տեսաֆիլմեր, նվագախումբ, բեք-վոկալ, պարախումբ, մենակատարներ. Strаnger համերգային նախագիծը տևեց 4 ժամ, Դիմաշը երգեց 3,5 ժամ՝ հանդիսատեսին պարգևելով նախ և առաջ իր բացառիկ տաղանդի արգասիքը՝ յուրօրինակ ձայնը վայելելու հնարավորությունը։
Ղազախ երգիչը համերգային ծրագրում ներկայացրեց իր ազգային նվագարանները ոչ միայն բեմի վրա, այլև փոքրիկ տեսանյութերով՝ ինչպես են դրանք ստեղծվել, որ դարում, ինչ ճանապարհ են անցել։ Ընդհանրապես նա ունի ազգային մշակույթի խոր գիտակցում ու իր գործունեությունը խարսխել է հենց ղազախական ավանդույթների, պատմության ու մշակույթի վրա։
Սա նաև ճիշտ դիվանագիտություն ու քարոզչություն է, ինչին անդավաճան հետևում է Դիմաշ Կուդայբերգենը։
Հայ հանդիսատեսին անակնկալ մատուցեց. երգեց Կոմիտասի «Սարերի հովին մեռնեմ» երգը։ Խոսեց դուդուկի մասին։
Ի դեպ, համեգից հետո նա հանդիպել է ՀՀ ժողովրդական արտիստ Գևորգ Դաբաղյանի հետ, որը նրա համար նվագել է «Սարերի հովին մեռնեմ» մեղեդին ու իր դուդուկը նվիրել Դիմաշին։
6 օկտավա և 8 կիսատոն բացառիկ տիրույթով եզակի երգչի Strаnger նախագիծը կվայելեն աշխարհի ևս 18 երկրում։ Հայաստանից հետո Դիմաշը մեկնելու է Թուրքիա, Մալազիա, Ֆրանսիա։
