Հայաստանի խորհրդարանը, ամենայն հավանականությամբ, կընդունի օրինագիծ՝ Եվրամիությանն անդամակցելու գործընթաց սկսելու համար. Դավոսում Համաշխարհային տնտեսական համաժողովի շրջանակում պանելային քննարկման ժամանակ ասել է ՀՀ վարչապետ Նիկոլ Փաշինյանը։
Մենք որոշեցինք որդեգրել հավասարակշռված և հավասարակշռող արտաքին քաղաքականություն, ինչը նշանակում է, որ մենք փորձելու ենք հավասարակշռություն ստեղծել Եվրամիության հետ մեր հարաբերություններում և Ռուսաստանի հետ հարաբերություններում. նշել է նա՝ հավելելով, որ հավասարակշռված հարաբերություններ են փորձում ստեղծել նաեւ տարածաշրջանային տերությունների հետ:
«Իրանի հետ մեր հարաբերությունները շատ կարևոր են։ Մենք փորձում ենք դիվանագիտական հարաբերություններ հաստատել Թուրքիայի հետ։ Փորձում ենք խաղաղության գործարք կնքել Ադրբեջանի հետ։ Եվ իհարկե, դա հեշտ չէ։ Բայց մյուս կողմից, ես չեմ կարծում, որ դա անհնար է: Դա կարող է տարօրինակ թվալ, բայց, իրոք, մենք կասկածելիորեն թափանցիկ ենք մեր բոլոր միջազգային գործընկերների հետ մեր մտադրություններում: Մենք կիսում ենք բոլոր գործընկերների հետ այն, ինչ անում ենք մյուս գործընկերների հետ»,- ասել է Փաշինյանը:
