Դուք էդպիսի իրավասությո՞ւն ունեք, որ աշխատանքային փուլի ժամանակ, որպես լրագրող, զանգեք ու խանգարեք, լսելով Azga.am-ի թղթակցի՝ Լաչինի միջանցքն ադրբեջանցիների կողմից այսօր կրկին փակելու հարցը՝ ասաց ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։
Թույլ չտալով որևէ բան հակադարձել՝ իշխանական պատգամավորը շարունակեց.
«Նախ, Դուք ինձնից համար վերցրե՞լ եք։ Դրա համար օգնական գոյություն ունի, դրա համար լրատվական ծառայություններ կան ստեղծված, ցտեսություն Ձեզ»,- ասաց նա և հեռախոսն անջատեց։
Նշենք, որ այսօր համացանցում տարածված տեսանյութից պարզ է դառնում՝ ադրբեջանական լրատվամիջոցների մի խումբ ներկայացուցիչներ, ակտիվիստներ, բլոգերներ և հասարակական կազմակերպությունների անդամներ այս պահին շարունակում են փակ պահել Լաչինի միջանցքը։
Նրանք հարձակվում են ռուս խաղաղպահների վրա՝ այսպիսով բախում հրահրելով։
Ադրբեջանցի իբր բնապահպաններն, իրենց հերթին, ի նշան բողոքի՝ վրաններ են տեղադրել Գորիս-Ստեփանակերտ ճանապարհին։
Հիշեցնենք, որ առաջին անգամ ադրբեջանցիները Լաչինի միջանցքը կեղծ բնապահպանական պատճառաբանությամբ փակել էին դեկտեմբերի 3-ին։
