Վեհափառը ՀՀ իշխանությունների կողմից դիտվում է որպես թշնամական բանակի հրամանատար, որի դեմ կարելի է ամեն քայլ կիրառել։ Իշխանությունը հենց այդպես էլ վարվում է և վարվելու է։ Երբ վերջին երևույթները դիտարկում ենք այս համակարգում, Սարդարապատի հուշահամալիրում Կաթողիկոսի և մյուս եկեղեցականների դեմ գործողությունները լրիվ բնականոն են դառնում, Azg.am-ի թղթակցի հետ զրույցոում ասաց քաղտեխնոլոգ Արմեն Բադալյանը։
«Հայաստանում քաղաքական գործոններն իրար մրցակից չեն, ինչպես Արևմուտքում, այլ իրար թշնամիներ են։ Եթե դուրս ես գալիս թշնամուդ դեմ և ուզում ես նրան հաղթել, բնականաբար թշնամիդ՝ այս դեպքում իշխանությունը, դիմելու է բոլոր հնարավոր քայլերին իշխանությանը պահելու, հակառակորդին կոտրելու, նրան պատժելու համար։ ՀՀ իշխանության և Հայ Առաքելական եկեղեցու այժմյան հարաբերությունները պետք է դիտարկել հենց այս կոորդինատային համակարգում։
Այստեղ ոչ թե ինչ-որ քաղաքական գործընթացներ են, այլ պարազապես կա երկու ճամբար՝ իշխանությունը՝ թիկունքին ունենալով ոստիկանությանը և հասարակության մի ստվար զանգվածը, որը չունի զորք, և որի պայքարը ղեկավարում է հոգևոր ներկայացուցիչը»,- ասաց Արմեն Բադալյանը։
Քաղտեխնոլոգի խոսքով՝ Հայաստանը չպետք է դիտարկել որպես ժողովրդավարական երկիր, որտեղ հոգևոր դասի ներկայացուցիչների նկատմամբ չի կարելի ճնշումներ գործադրել։ Այնինչ ժողովրդավարական երկրներում իշխանությունների պատիվը, վարկանիշն ու հեղինակությունն առանձին գործոններ են և կոնկրետ դերակատարություն ունեն։
«Հայաստանում դրանք չաշխատող գործոններ են։ Կրկնում եմ՝ մեզ մոտ թշնամական ճամբարներ կան, որոնք դուրս են եկել միմյանց դեմ պատերազմի։ Եվ պետք է հասկանալ, որ ցանկացած գործողություն, որը հաղթանակ է բերում, արդարացված է։
Իշխող քաղաքական թիմը գիծ է քաշել, որից այն կողմ եկեղեցին չպետք է անցնի։ Օրինակ՝ իշխանության պատկերացմամբ՝ Հայ Առաքելական եկեղեցին չպետք է իշխանության փոփոխության հարց բարձրացնի։ Եթե եկեղեցին իշխանափոխության հարց չի բարձրացնում, այլ միայն մկրտության, հարսանիքի կամ հուղարկավորության ծեսեր է իրականացնում, նշանակում է՝ իշխանության հետ խնդիր չունի, չի անցնում իշխանության գծած սահմանը։
Այլ կերպ ասած՝ եթե դու սահմանը չես անցնում, իշխանությունը ոչինչ չի անում, բայց եթե փորձես «գրավել» իր տարածքը, իշխանությունը հակահարձակում է իրականացնելու »,- ամփոփեց Արմեն Բադալյանը։
Հիշեցնենք, որ իրավապահները երեկ փորձել էին արգելելՀայ Առաքելական եկեղեցու առաջնորդ Ամենայն Հայոց կաթողիկոսի մուտքը Սարդարապատի հուշահամալիր։
Մայր Աթոռն ավելի ուշ սա դատապարտելի պահվածք էր որակել՝ հայտարարելով, որ «հուշահամալիրի տարածք մուտք գործելու հարուցված արգելքներն ու բռնի գործողությունները հերթական դրվագն են իշխանությունների ամոթալի ու ապազգային գործունեության»։
Նիկոլ Փաշինյանն էլ լրագրողներին այսօր ասել էր, թե ոստիկանությունը երեկ Սարդարապատում փորձել է ճշտել՝ արդյոք Վեհափառ հայրապետը «եկել է իր քաղաքական կողմնակիցների և իր կողմից ղեկավարվող շարժման նախաձեռնած խոչընդոտող և սադրող գործողությունները շարունակելու, թե այլ նպատակադրմամբ»։
