Խորհրդարանական վերահսկողության շրջանակներում պատգամավորներն ունեն իրավունք իրենց վերաբերմունքը հայտնելու կառավարության անդամների, նրանց կատարած աշխատանքի նկատմամբ: Գրիգոր Մինասյանը բացարձակապես չի տարբերվում կառավարության մնացած անդամներից: Այսինքն յուրահատուկ բան պետք չի այդտեղ փնտրել, որ Գրիգոր Մինասյանի հետ կա որևէ խնդիր: Այս մասին այսօր՝ լրագրողների հետ ճեպազրույցում ասաց ԱԺ ՔՊ խմբակցության պատգամավոր Լուսինե Բադալյանը՝ պատասխանելով այն հարցին, թե ի վերջո, ո՞րն էր ՀՀ արդարադատության նախարար Գրիգոր Մինասյանի հրաժարականի պատճառը։
Հիշեցնենք, որ Բադալյանը , ի թիվս մի շարք ՔՊ-ականների, ևս ստորագրել էր Գրիգոր Մինասյանին պաշտոնանկ անելու հարցով Նիկոլ Փաշինյանին դիմելու նախաձեռնության ներքո
«Օրինակ՝ ես իմ առջև խնդիր եմ դրել, որ առաջիկայում արդեն ժամանակն է, և 6 տարին բավարար ժամանակ էր, որ ես կարողանամ հաշվետվություն պահանջել կառավարության բոլոր անդամներից և տեսնել՝ արդյոք այն ծրագրերը, որ մենք դրել ենք մեր առջև, այն խոստումները, որոնք մենք տվել ենք, արդյոք այդ ամենը իրականացրել ենք, թե ոչ: Այստեղ որևէ անձնական խնդիր չկա»,- ասաց պատգամավորը:
Լուսինե Բադալյանը միաժամանակ ափսոսանք հայտնեց, որ Գրիգոր Մինասյանի պաշտոնանկության հարցով ստորագրահավաքի հարցը դարձել է հրապարակային քննարկումների առարկա։
«Դա խմբակցության ներքին խնդիրն էր, որը բացարձակապես չէր ենթադրում իմպիչմենթ կամ հարցապնդում: Մենք ունենք ներքին պայմանավորվածություններ, որ եթե որոշակի քանակով պատգամավորներ խնդիր ունեն կառավարության մեկ անդամի հետ կապված, մենք դիմում ենք այդ հարցով:
Եթե անընդհատ բոլորը խոսում են այն մասին, որ երկրում արդարադատությունը կաղում է, որ վերջին 2 տարվա ընթացքում մենք մեր առջև դրված բոլոր խոստումներն ու խնդիրները չենք կարողացել կատարել, ապա, բնականաբար, դրա համար պետք է պահանջենք պատասխանատվություն»,- ասաց Բադալյանը:
Հարցին՝ արդյոք Նիկոլ Փաշինյանի հրաժարականը ևս պահանջելու են, որովհետև նա իշխանության է եկել անվտանգային խոստումներով, սակայն դրանք այդպես էլ չի կատարել, ՔՊ-ական պատգամավորն արձագանքեց. «Դուք լուրջ կարծում եք, որ ես պետք է ձեր հարցին պատասխանեմ, որ Նիկոլ Փաշինյանի հրաժարականը ևս պահանջելո՞ւ ենք. իհարկե, ոչ»:
Լուսինե Բադալյանը հայտարարեց, որ իր սուբյեկտիվ կարծիքով շատ են նախարարները, որոնց հրաժարականը արժե պահանջել. «Ինձ ավելի հեշտ է ասել՝ ումից եմ գոհ, քան թվարկել, թե ումից եմ դժգոհ: Սա թողնենք:
Ես, որպես պատգամավոր, պետք է լինեմ ժողովրդի ձայնը, և ցանկացած խնդիր, բողոք, որ քննարկվում է ժողովրդի մեջ, պիտի բարձրաձայնեմ իր լծակներով:
Առաջինը հրաժարական տվեց Գրիգոր Մինասյանը, բայց դա չի նշանակում, որ խնդիր ունենք միայն արդարադատությունում:
Ես ուզում եմ, որ կառավարության բոլոր անդամները, բոլոր նախարարները, բոլոր գերատեսչությունները, իրավապահ մարմինները շատ լավ իմանան, որ խորհրդարանական վերահսկողության շրջանակներում բոլոր գործիքները կիրառվում են, և որևէ բացթողում մեր աչքից չի վրիպելու», հայտարարեց ՔՊ-ական պատգամավորը:
Բադալյանը անկեղծացավ, թե որտեղից սկսվեց այս խնդիրը. «Անցած կառավարության հետ հարցուպատասխանից, երբ քննարկվեց թմրանյութերի և այլ հանցագործությունների չբացահայտման խնդիրը, որի հաջորդ օրը վարչապետը հրավիրեց հատուկ կառավարության նիստ այդ բոլորը քննարկելու, այդ նիստում հնչած բոլոր կարծիքները, հիմնավորումները, վիճակագրությունը անմիջապես բարձրաձայնվեցին մեր կողմից»:
Լրագրողները պատգամավորից հետաքրրքվեցին՝ ո՞վ է լինելու ՔՊ-ի հաջորդ թիրախը, Բադալյանն պատասխանեց. «Թիրախի մասին չէ խոսքը, եթե որևիցե մեկը չի ընկալում, որ սա թիրախ չէ, անձնական խնդիր չէ։ Սա ուղղակի արդեն կուտակված բոլոր խնդիրները լուծելու համար վերահսկողություն սահմանել է»:
Հիշեցնենք՝ ՀՀ արդարադատության նախարար Գրիգոր Մինասյանն այսօր հայտաարել է, որ հրաժարականի դիմում է ներկայացրել:
Արդարադատության նախարար Գրիգոր Մինասյանին պաշտոնանկ անելու համար «Քաղաքացիական պայմանագիր» խմբակցությունը ստորագրահավաք էր նախաձեռնել:
