Դանակը հասել է ոսկորին՝ այն աստիճանի, որ Արցախի իշխանություններն արդեն սպառում են համբերելու, դիմանալու, ախորժակները զսպելու, գոտին ձգելու վերջին ռեզերվները, Azg.am-ի թղթակցի հետ զրույցում ասաց Արցախյան շարժման ակտիվիստ, հասարակական-քաղաքական գործիչ Բորիս Առուշանյանը՝ անդրադառնալով Արցախում համաժողովրդական շարժման մեկնարկին։
«Առջևում աշուն է, իսկ հետո՝ ձմեռ։ Այժմ պետք է վճռական քայլեր կատարվեն, բայց մյուս կողմից իշխանություններն առայժմ չեն ցանկանում կոշտ քայլերի գնալ՝ հույս ունենալով, որ ռուսների, ՀՀ իշխանությունների և միջազգային հանրության միջոցով հնարավոր կլինի շտկել իրավիճակը։ Եթե դա չստացվի, իմ խորին համոզմամբ՝ գնալու ենք ծայրահեղ քայլերի. հո սովից չե՞նք մեռնելու։ Իմ կարծիքով դա ընդհուպ զենք վերցնելն է։ Միգուցե իշխանություններն ուրիշ ճանապարհով գնան, բայց ես գտնում եմ, որ եթե վերը թվարկած 3 ուժերը խիստ միջոցներ չձեռնարկեն և Ադրբեջանին չստիպեն կատարել նոյեմբերի 9-ի պայմանագրի կետերը, այլ զարգացումներ կարող են լինել։
Մեզ ելք չեն թողնում, ընտրության հնարավորություն չեն տալիս՝ ո՛չ Հայաստանը, ո՛չ Ադրբեջանը, ո՛չ էլ միջազգային հանրությունը։ Ուրեմն ի՞նչ պետք է անի արցախցին»,- հռետորական հանց հնչեցրեց մեր զրուցակիցը։
Հարցին՝ ինչո՞ւ այսօրվա հանրահավաքի կազմակերպիչներից որևէ մեկը պատասխանատվության չկանչեց ՀՀ վարչապետ Նիկոլ Փաշինյանին, ով այսօր ընդամենն Արցախի՝ Ադրբեջանի տիրապետության տակ անվտանգ ապրելու հնարավորություն է մուրում, մեր զրուցակիցը պատասխանեց՝ Փաշինյանը շատ լավ գիտի արցախցիների տեսակետը և պետք է գիտակցի, որ չի կարողանալու հենց այնպես զոհաբերել Արցախի շահը։
«Եթե նրան թվում է, թե Արցախը հանձնելով՝ կարողանալու է փրկել Հայաստանը, շատ է սխալվում։ Եթե այսպես շարունակվի, գործը պատերազմի է հասնելու, իսկ եթե հասնի պատերազմի, Հայաստանն ուզած-չուզած մասնկացելու է դրան։ Եթե նույնիսկ իշխանությունը չմասնակցի, ժողովուրդն է մասնակցելու։ Նիկոլը պետք է լավ հասկանա, որ Արցախը հանձնել չի ստացվելու, մենք չենք ինտերգրվելու Ադրբեջանին. դա բերելու է պատերազմի»,- ասաց Բորիս Առուշանյանը։
Անդրադառնալով Ադրբեջանի ԱԳ նախարար Ջեյհուն Բայրամովի հայտարարությանը, որ ադրբեջանական կողմը չի բացառում «հայկական ծագմամբ բնակիչներին» օգնության տրամադրման հնարավորությունը՝ Աղդամ-Ստեփանակերտ ճանապարհի օգտագործմամբ, մեր զրուցակիցը շեշտեց՝ նման բան անհնար է։
«Դա չի ստացվելու, բացառվում է, որովհետև մերոնք Կարմիր խաչին զգուշացրել են, որ նման բան թույլ չենք տալու։ Կարմիր խաչն ինչպես աշխատել է, այնպես էլ պետք է աշխատի՝ Լաչինի միջանցքով։ Ադրբեջանին ինտեգրվելու մասին խոսք անգամ լինել չի կարող, այդ երկիրը չի կարող մեզ պատին դեմ տալ։ Մենք չենք ընդունելու Ադրբեջանի պայմանները. մենք ունենք կարմիր գծեր, որոնք չենք անցնելու։
Աղդամի ճանապարոհով այդ ի՞նչ պետք է մեզ առաջարկեն ադրբեջանիցները՝ միայն դեղորա՞յք»,- հարց հնչեցրեց Բորիս Առուշանյանը։
Հիշեցնենք, որ այսօր Արցախում մեկնարկել է համաժողովրդական անժամկետ շարժումը։
