Առավել կոնկրետ սոցիոլոգները կարող են պատասխանել՝ՀՀ քաղաքացիների քանի տոկոսն է վստահում ԴՕԿ կուսակցության հիմնադիր Վարդան Ղուկասյանին և բացի այդ՝ վստահողների քանի տոկոսն է պատրաստ նրա հորդորով գործողությունների դիմել. հնարավոր է՝ այդ մարդուն վստահում է 50 հազար մարդ, բայց փողոց դուրս գալ պատրաստ է 10 հազար մարդ։ Azg.am-ի թղթակցի հետ զրույցում այս մասին ասաց քաղտեխնոլոգ Արմեն Բադալյանը՝ անդրադառնալով Վարդան Ղուկասյանի հայտարարությանը, որ իրեն պետք է տրամադրի՝ այս ամսվա ընթացքում կոնկրետ գործողությունների գնալու։
«Երկրորդ՝ Հայաստանն այն երկիրը չէ, որ որոշես 50 հազար մարդ հավաքել և իշխանափոխություն անել։ Իշխանափոխության համար դու պարտադիր պետք է ունենաս կա՛մ Արևմուտքի, կա՛մ Ռուսաստանի թույլտվությունն ու աջակցությունը, որովհետև Հայաստանի համար դեռ լուծված չէ Արցախի հարցը, առկա է անվտանգությա ապահովման հարց, որտեղ բախվում են Արևմուտքի և Ռուսաստանի հակադիր շահերը։
Այս պայմաններում ուզես թե չուզես՝ պետք է կա՛մ այս կա՛մ այն բլոկի հետ պարզես քո հարաբերությունները, որպեսզի իշխանափոխություն իրականացնելու դեպքում տվյալ բլոկը կաշկանդի Ադրբեջանին և թույլ չտա, որ նա ռազմական գործողություններ իրականացնի»,- նշեց քաղտեխնոլոգը։
Արմեն Բադալյանի խոսքով՝ այս ամենից զատ՝առկա են բազմաթիվ այլ հարցեր՝ ինչպես օրինակ՝ արտաքին պարտքի սպասարկման, թիմ հավաքելու հարցը։
«Վարդան Ղուկասյանի թիմը, պարզվեց, Երևանի ավագանու թիմն էր, որն ավելի ուշ բաժանվեց 2-3 մասին։ Այս պահին անհասկանալի է՝ շատ մարդիկ թիմում են, թե թիմում չեն, կուսակցությունում են, թե կուսակցությունում չեն։ Այսինքն՝ այստեղ այնքան շատ հարցեր կան, որ միայն ուղիղ եթերով խոսելը չէ։
Իհարկե, Վարդան Ղուկասյանը որոշակի ընտրազանգված ունի։ Նա Երևանի ավագանու ընտրություններին «մկաններ ցույց տվեց», որ որոշակի ընտրազանգված կա։ Վարդան Ղուկասյանը միաժամանակ ցույց տվեց, որ տարածության խնդիր կա, որովհետև գտնվելով դրսում՝ ինքը չի կարողանում անմիջականորեն զբաղվել կուսակցական գործունեությամբ, օպերատիվ կերպով այս կամ այն հարցը կարգավորել, հետևաբար կարող է պառակտում առաջանալ»,- ամփոփեց Արմեն Բադալյանը։
Հիշեցնենք, որ Վարդան Ղուկասյանը, ֆեյսբուքյան եթերում անդրադառնալով երկրում ստեղծված իրավիճակին, ավելի վաղ հանդես էր եկել հայտարարությամբ՝ ասելով.
«Ես մի բան գիտեմ, որ երևի ինձ պետք է արդեն տրամադրեմ՝ էս ամսվա մեջ գնալու կոնկրետ գործողությունների։ Այլևս հնարավոր չէ, էսպես չի կարող շարունակվել»։ նա
