Ստեփանակերտը և Արցախի մյուս բնակավայրերն այս պահին Ադրբեջանի կողմից զանգվածային հրետակոծության են ենթարկվում, Azg.am-ի թղթակցի հետ զրույցում ասաց Արցախյան շարժման ակտիվիստ, հասարակական-քաղաքական գործիչ Բորիս Առուշանյանը։
«Ես այս պահին փողոցում եմ, հավանաբար լսում եք օդային տագնապի և կրակոցների ձայները՝ օդից և ցամաքից։ Շատ ինֆորմացիա չունենք, չգիտենք՝ լայնածավալ կռիվ է սկսվել, թե ինչ»,- ասաց մերի զրուցակիցը։
Անդրադառնալով Ադրբեջանի պաշտպանության նախարարության հայտարարությանը, որ Լեռնային Ղարաբաղում «հակաահաբեկչական գործողություն» է անցկացվում, Բորիս Առուշանյանը նշեց.
«Փաստորեն ադրբեջանցիները պատերազմ են սկսել։ «Կրուգավոյ» կռիվ է գնում՝ սահմանի ողջ երկայնքով։ Ստեփանակերտի չորս կողմը հիմա ռմբակոծում և հրետակոծում են»,- ասաց նա։
Նշենք, որ մեր խոսակցության ողջ ընթացքում կրակոցներ էին լսվում։
Նշենք նաև, որ ԱԺ «Պատիվ ունեմ» խմբակցության պատգամավոր Տիգրան Աբրահամյանը ֆեյսբուքյան իր էջում գրել է.
«Ադրբեջանը կեղծ ահաբեկչական մեղադրանքը հնչեցնելով Արցախի հասցեին, այս պահին տարբեր ռազմական օբյեկտների ուղղությամբ, տարբեր միջոցներով, զինատեսակներով կրակ է բացել։ Առաջնահերթ թիրախներ են ընտրվել, որոնք այս պահին կրակի տակ են:
Այս պահին հստակ չի, թե քաղաքացիական օբյեկտները ևս թիրախավորվում ե՞ն, թե՞ ոչ, բայց հարվածները շարունակվում են»:
