Մինչև անգամ բառեր չեմ գտնում արտահայտելու ՔՊ-ական պատգամավոր Գևորգ Պապոյանի վարքը. Արցախի և արցախցիների մասին նրա խոսքերը կարելի է բնորոշել որպես վախկոտություն և անհեռատեսություն, քանի որ այդ պատգամավորին և նրա նման մտածողներին թվում է, որ Ադրբեջանին անընդհատ զիջումներ անելով՝ ապահովում են ՀՀ զարգացման հեռանկարները։ Azg.am-ի թղթակցի հետ զրույցում այս մասին ասաց Արցախյան շարժման ակտիվիստ, հասարակական-քաղաքական գործիչ Բորիս Առուշանյանը։
Հիշեցնենք՝ Գևորգ Պապոյանն այսօր ԱԺ-ում հայտարարել էր. «Լուծարեն ԼՂ բանակը, զենքերը հանձնեն Ադրբեջանին, լուծարեն ԼՂ Ազգային ժողովը, բայց գան Հայաստանում ԼՂ ԱԺ նի՞ստ անեն։ Սա Հայաստանի դեմ ռումբ է, սա անթույլատրելի է։ Լեռնային Ղարաբաղը վարի տան, հիմա գան Հայաստանը վարի տա՞ն։ Հերիք չեղա՞վ»։
Արցախցի գործչի խոսքով՝ ՔՊ-ական պատգամավորի նմանօրինակ խոսքերն էլ ավելի են ոգևորում Ադրբեջանի իշխանություններին՝ շարունակելու իրենց հակահայ գործունեությունը։
«Ադրբեջանը, ոգևորված ստեղծված իրավիճակից, ՀՀ թույլ և պարտվողական կեցվածքից, Թուրքիայի հետ միասին անընդհատ առաջ է մղում իր ծրագրերը։ Այս ճանապարհին նա անում է և անելու է հնարավոր ամեն ինչ։
Մյուս կողմից միջազգային հանրությունը կարծես հասկացել է, որ Ադրբեջանին թույլ է տվել ավելին, քան կարելի էր, և նրանք լկտիացել են։
Հիմա Գևորգ Պապոյանը պետք է օգտվի առիթից, որ միջազգային հանրությունը կարող է ինչ-որ հայանպաստ քայլեր կատարել, պահանջի արցախահայերի իրավունքների պաշտպանություն, հայտարարի, որ ԱՀ նախագահ Սամվել Շահրամանյանը ստիպված է ստորագրել Արցախի լուծարման հրամանագիրը, և ԱՀ պետական մարմիններն իրավունք ունեն իրենց գործունեությունը ծավալելու Հայաստանում»,- ասաց Բորիս Առուշանյանը։
Մեր զրուցակիցն ընդգծեց՝ արցախահայության գործողությունները որևէ կերպ չեն վտանգում ՀՀ շահերը։ Անգամ շաբաթներ առաջ ԱՀ նախագահ Սամվել Շահրամանյանի հետ հանդիպմանը վերջինս իրենց պարզ տեքստով ասել է՝ արցախցիները ՀՀ տարածքում չեն ձեռնարկելու որևէ քայլ, որը կսպառնա ՀՀ անվտանգությանը, ընդամենը փորձելու են զբաղվել իրենց խնդիրների լուծմամբ։ Նման պայմաններում, ըստ Առուշանյանի, արցախահայության հասցեին հանիրավի մեղադրանքներ հնչեցնելն ուղղակի անբարոյականություն է։
Անդրադառնալով իշխանական պատգամավորի հայտնած այն մտքին, որ Արցախի կապիտուլյացիայի պայմանագիրը ստորագրել է ոչ թե Սամվել Շահրամանյանը, այլ Ռոբերտ Քոչարյանն ու Սերժ Սարգսյանը, Բորիս Առուշանյանը նկատեց՝ կասկածից վեր է, որ ՀՀ երկրորդ և երրորդ նախագահներն այս հարցում իրենց մեղքի բաժինն ունեն, բայց դա ամենևին չի նշանակում, որ Քոչարյանն ու Սարգսյանն են, Պապոյանի իսկ խոսքով, Արցախը «վարի տվել»։
«Ամենամեծ պատասխանատվությունն, իհարկե, ընկնում է ՀՀ և ԱՀ իշխանությունների վրա, որոնք 2020 թվականի պատերազմի ժամանակ ղեկավարում էին Հայաստանն ու Արցախը։ Ամեն մեկն ունի իր մեղավորության աստիճանը, իր բաժին մեղքը»,- ամփոփեց մեր զրուցակիցը։
