Վրացագետ Ջոնի Մելիքյանը դժվար է պատկերացնում, որ հայկական որևէ գյուղ հենց այնպես անցնի Վրաստանին կամ հակառակը։ Ըստ նրա, սակայն, հայ-վրացական սահմանի երկու կողմում էլ կան արոտավայրեր և հարակից տարածքներ ունեցող գյուղեր, որոնց սահմանը, վրացագետի գնահատմամբ, ոչ այդքան հարմար է անցնում։
«1996 թվականին ստեղծված սահմանազատման-սահմանագծման հանձնաժողովները վերջին հանդիպումների ընթացքում ֆիքսել են, որ կա քաղաքական որոշում՝ ակտիվացնելու սահմանի հստակեցման գործընթացը, ինչն, իմ կարծիքով, շատ ճիշտ է։
Այդ հանձնաժողովների աշխատանքները պետք է բերեն մի իրավիճակի, երբ փոխադարձ զիջումների արդյունքում ստեղծվի մի ստատուս քվո, որ բոլոր գյուղերն ունենան այն, ինչ պետք է ունենան՝ հավելյալ տարածքներ և այլն։ Սահմանը պետք է ֆիքսվի այնպես, որ հայկական և վրացական կողմերը գոհ լինեն և ստորագրվի միջպետական համաձայանգիր՝ փակելով տասնյակ տարիներ օդում կախված հարցը»,- , Azg.am-ի թղթակցի հետ զրույցում ասաց Ջոնի Մելիքյանը։
Ըստ վրացագետի՝ կա հստակ երկու էլեմենտ՝ հարցի լուծման քաղաքական որոշում և սկզբունք, որ զիջումները փոխադարձ են լինելու՝ երկու կողմից. որևէ մեկը մյուսի հաշվին ոչինչ չի կորցնելու։
«Կա հայ-վրացական սահմանի վերաբերյալ ԱԳՆ-ի պաշտոնական պատասխան, որն պրոցեսի սկիզբ է ակնարկում։ Մենք տասնյակ տարիներ բանակցությունների մեջ ենք եղել, բայց չի նշանակում, որ կես կամ մեկ տարուց կարող ենք այդ պրոցեսն ավարտել։ Բայց նաև ոչ ոք չի ասում, որ չենք ավարտի։
Ամեն ինչ կախված է քաղաքական պատրաստակամությունից, և այսօր այդպիսի պատրաստակամություն կա։ Պարզապես պետք է հայ-վրացական հանձնաժողովներն աշխատեն միմյանց հետ՝ փոխզիջումային տարբերակով հասնելու ինչ-որ հանգրվանի»,- ասաց վրացագետը։
Ջոնի Մելիքյանը միաժամանակ վկայակոչեց միջազգային փորձը՝ ընդգծելով, որ խնդրահարույց հատվածների շուրջ փոխհամաձայնության չգալու պարագայում, եվրոպական շատ երկրների օրինակով, կողմերն ազատ են դիմելու միջազգային դատարան։
«Միջազգային դատարանի որոշումը կողմերի համար անբեկանելի կլինի, սակայն հուսվ եմ, որ հայ-վրացական հարաբերություններում պետք է որ փոխըմբռնում լինի»,- ամփոփեց մեր զրուցակիցը։
Հիշեցնենք, որ ըստ yerkir.am-ի՝ վերջին շրջանում ակտիվացել են խոսակցություններն այն մասին, որ հայ-վրացական բարձրաստիճան շփումներում Նիկոլ Փաշինյանն ակտիվացրել է սահմանազատման-սահմանագծման աշխատանքների թեման՝ որոշակի տարածքներ զիջելու Վրաստանին: Խոսքը, մասնավորապես, վերաբերում է Հայաստան-Վրաստան սահմանագոտու Ջիլիզա գյուղին (ՀՀ Լոռու մարզի Ալավերդիի շրջան) հարող տարածքներին:
Արտաքին գործերի նախարարությունից լրատվամիջոցին հղած գրավոր պատասխանի մեջ հաստատվել է, որ «…Հայաստանի և Վրաստանի բարձրաստիճան ներկայացուցիչների վերջին շփումների ընթացքում ձևավորվել է ընդհանուր ընկալում, որ անհրաժեշտ է ակտիվացնել Հայաստանի և Վրաստանի միջև միջպետական սահմանի սահմանազատման և սահմանագծման աշխատանքները»:
