Դաշնակցությունն այս տարի եւս ջահերով երթ կիրականացնի: Ապրիլի 23-ին Ծիծեռնակաբերդի բարձունքում կլինի ընդդիմադիր ամբողջ էլիտան: «Ազգ»-ին հասած տեղեկություններով՝ այդ օրը խորհրդարանական ընդդիմությունը կհայտարարի փողոց դուրս գալու եւ «Փաշինյանի իշխանությունից ազատվելու մասին»:
«Գցել-բռնել են, որ ընդդիմադրի բարձր կոչումը չկորցնելու եւ մարդկանց արդարացի բողոք-հարցը՝ ո՞ւր է ընդդիմությունը, արդարացնելու համար, որոշել են հերթական անգամ հայտարարել «հայրենիքի փրկության» շարժման մասին»,- ասաց մեր զրուցակիցներից մեկը:
«Ո՞վ է գլխավորելու շարժումը». հարցրեցինք: «Գրեթե ոչինչ չի փոխվել դեմքերի ու շարժումը գլխավորելու մասով: ՀՅԴ գերագույն մարմնի ներկայացուցիչ, ԱԺ պատգամավոր Իշխան Սաղաթելյանն է Ծիծեռնակաբերդից հայտարարելու փողոցի շարժման մասին: Եվ, ենթադրելի է, որ նա էլ կգլխավորի շարժումը»,- մանրամասնեց «Ազգ»-ի աղբյուրը:
Հարցին՝ ստացվում է՝ անգամ սցենարն ու լոզունգնե՞րն են նույնը լինելու, մեր զրուցակիցն արձագանքեց. «Դա չեմ կարող ասել, բայց ընդդիմության ներսում էլ կան քննադատներ, որ լիդերներին հորդորում են՝ մարդկանց հերթական անգամ փողոց չհանել, հետո հանդարտեցնել ու տուն ուղարկել»:
ՍԵՎԱԿ ՎԱՐԴՈՒՄՅԱՆ
