ԵՄ արտաքին քաղաքականության և անվտանգության հարցերով բարձրագույն ներկայացուցիչ Ժոզեպ Բորելը հույս է հայտնել, որ Ադրբեջանի և Հայաստանի ղեկավարները կկարողանան հանդիպել Բրյուսելում և քննարկել տարածաշրջանային իրավիճակը։
Ինչպես հաղորդում է ՏԱՍՍ-ը, այս մասին նա հայտարարել է Գրանադայում Եվրոպական քաղաքական համայնքի (EPC) գագաթնաժողովում։
«Ափսոս, որ Ադրբեջանն այստեղ չէ, ափսոս, որ Թուրքիան՝ Ադրբեջանին աջակցող գլխավոր երկիրը, նույնպես չկա»,- ասաց նա։
«Հուսով եմ, որ Հայաստանի և Ադրբեջանի միջև հանդիպումները կարող են տեղի ունենալ Բրյուսելում», – հավելել է Բորելը։
Ավելի վաղ Ադրբեջանի նախագահ Իլհամ Ալիևը հրաժարվել էր մեկնել Իսպանիա, որտեղ նախատեսվում էր հանդիպում Հայաստանի վարչապետ Նիկոլ Փաշինյանի հետ՝ Եվրամիության, Ֆրանսիայի և Գերմանիայի ղեկավարների մասնակցությամբ։
Թշնամու լրատվամիջոցները հայտնում են, որ հանդիպումից հրաժարվելու պատճառը եղել է Ֆրանսիայի «ապակառուցողական դիրքորոշումը», որը մասնակցում է հնգակողմ հանդիպմանը, ինչպես նաև Փարիզի և Բեռլինի անհամաձայնությունը Թուրքիայի մասնակցության վերաբերյալ։
