Մենք Արևմուտքից Ռուսաստանի հետ հարաբերությունները խզելու, Ռուսաստանին դուրս մղելու որևէ ազդակ չենք ստանում, չենք ստացել, և չեմ կարծում, թե այդպիսի ազդակ երբևէ կլինի։ Այսինքն, մենք մեր երկկողմ հարաբերությունները ՌԴմեր գործընկերների հետ շատ թափանցիկ ենք քննարկում, և կարծում եմ, որ որևէ մութ կետ չկա այդ խոսակցություններում մեր մտահոգությունների մասին, որոնք մենք ունենք տարածաշրջանում Ռուսաստանի և մեր հարաբերություններում առկա իրադրության վերաբերյալ, այսօր կայացած մամուլի ասուլիսի ժամանակ ասաց ՀՀ վարչապետը։
Անդրադառնալով Լաչինի միջանցքում առկա իրավիճակին՝ Փաշիանյանը հիշեցրեց՝ 2020 թվականի նոյեմբերի 9-ի եռակողմ հայտարարության համաձայն՝ Լաչինի միջանցքը վերահսկողության տակ պահելը Ռուսաստանի պարտավորությունն է։ Եռակողմ հայտարարության մեջ արձանագրվել է, որ միջանցքը պետք է մնա ՌԴ խաղաղապահ ուժերի վերահսկողության ներքո։ Հետևաբար, Ադրբեջանի կողմից ապօրինի անցակետի տեղադրումն այդ պարտավորության խախտում է։
«Ռուսաստանն այդ միջանցքը պետք է պահի իր վերահսկողության ներքո։ Նախկինում էլ մենք թե աշխատանքային մակարդակում, թե հրապարակային բազմիցս խոսել ենք Խծաբերդից մինչև Փառուխ տեղի ունեցած իրադարձությունների մասին։ Ի վերջո, եռակողմ հայտարարությամբ արձանագրվել է շփման գիծ հասկացությունը և արձանագրվել է շփման գծից ներս Ռուսաստանի խաղաղապահ ուժերի պարտավորությունները, և մենք անընդհատ քաջալերել ենք, մեր կողմից ոչ մի խնդիր չենք ստեղծել, ինչով կարողացել ենք օգնել ենք, որ այդ պարտավորությունները լիարժեք կատարվեն»,- ասաց ՀՀ վարչապետը։
Փաշինյանը չի ցանկանում, որ Արևմուտքից արված որևէ ենթադրյալ հայտարարություն դառնա հայ-ռուսական հարաբերությունների կարևոր կամ առանցքային գործոն։ «Մեր հարաբերությունների ամենակարևոր գործոնը մեր հարաբերություններն են՝ այն փոխադարձ պարտավորությունները, որ մենք ունենք իրար նկատմամբ։ Որքանո՞վ են կատարվում այդ պարտավորությունները… Ես չեմ կարծում, որ Արևմուտքը որևէ մեկի ձեռքը բռնել է և թույլ չի տալիս, որ այդ պարտավորությունները կատարվեն»,- ասաց Փաշինյանը։
ՀՀ վարչապետը միաժամանակ նկատեց՝ ՀԱՊԿ առաքելությունը ՀՀ տարածքում չի գործում մի պարզ պատճառով, քանի որ չի մատնանշում, իր պատկերացրած ՀՀ տարածքը:
«Ֆունդամենտալ պրոբլեմը սա է: Երբ որ ՀԱՊԿ-ը դա հստակ կընդգծի, պրոբլեմների 90 տոկոսը կվերանա»,- ասաց նա:
