Արցախյան շարժման ակտիվիստ, հասարակական-քաղաքական գործիչ Բորիս Առուշանյանը գտնում է, որ ամերիկացի կոնգրեսականների հեղինակած հայամետ բանաձևերից վնաս չկա, բայց մեծ օգուտ էլ չկա։ Նա համոզված է, որ նման օրինագծերը գործնականում որևէ կերպ չեն ստիպել և չեն ստիպելու Ադրբեջանին զղջալ արցախահայության նկատմամբ էթնիկ զտումների համար։
Հիշեցնենք՝ ԱՄՆ Կոնգրեսի Ներկայացուցիչների պալատի անդամներ Աննա Էշուն և Քրիս Սմիթն երկկուսակցական բանաձև են ներկայացրել, որը դատապարտում է Ադրբեջանին՝ Լեռնային Ղարաբաղի բնակչության նկատմամբ էթնիկ զտումներ իրականացնելու համար: Օրինագծով Բայդենի վարչակազմին կոչ է անում վճռականորեն աջակցել հայերի իրավուքններին Ադրբեջանի կառավարության շարունակական հանցագործությունների դեմ։
«Արցախահայերի իրավունքները պաշտպանող բանաձևեր, իհարկե, պետք են, քանի որ քաղաքական գործընթացները կարող են երկար տևել, և ԱՄՆ Կոնգրեսի որդեգրած դիրքորոշումն ի վերջո կարող է ճնշումն գործադրել Ադրբեջանի վրա։ Բայց, իմ կարծիքով, մինչև Ադրբեջանի դեմ լուրջ պատժամիջոցներ չկիրառվեն, մինչև Ալիևը վտանգ չզգա իր իշխանության, սեփական անձի, մերձավոր շրջապատւի և իր պետության գոյության համար, ոչ մի զիջման, անգամ փոխզիջման չի գնա», -Azg.am-ի թղթակցի հետ զրույցում ասաց Բորիս Առուշանյանը՝ հավելելով, որ Ադրբեջանի ղեկավարի այսօրինակ վարքն ապացուցված է վերջին տարիների նրա գործողություններով։
Մեր զրուցակիցը շեշտեց՝ ով ծանոթ է Ադրբեջանի գործելաոճին, պետք է իմանա, որ այդ երկրի ղեկավարությունը միայն ուժն է ընդունում, չի էլ թաքցնում՝ միջազգային օրենքներն իր համար գոյություն չունեն, այդ օրենքներն իր համար չեն գործում։
«Ալիևը մշտապես հայտարարում է, որ հանդես է գալու ուժի դիրքերից։ Նա բացահայտ ասում է այդ մասին։
Մյուս կողմից ԱՄՆ քաղաքականությունը պարզից էլ պարզ է. ոչ միայն ԱՄՆ-ը, այլև Արևմուտքը ցանկանում են թույլի՝ այս դեպքում հայկական կողմի հաշվին հաշտեցնել Հայաստանին և Ադրբեջանին։ Քանի որ մենք մեր բազմաթիվ սխալների արդյունքում վերջին պատերազմում պարտություն ենք կրել, բնական է, որ հանդես ենք գալիս թույլի դիրքերից։ Իսկ միջնորդները միշտ ձգտում են հեշտ ճանապարհ ընտրել, այսինքն՝ խնդիրները լուծել թույլի հաշվին, նրան համոզել գնալու նորանոր զիջումների»,- նշեց Բորիս Առուշանյանը։
Արցախցի գործչի համոզմամբ՝ Միացյալ Նահանգները և Եվրոպան կարմիր գծեր են գծում, որոնք, ի վերջո, Հայաստանի համար Արցախի և սեփական սահմանների կորուստ են արժենում։
«Այսքանից հետո կարող եմ ասել, որ ԱՄՆ Կոնգրեսի Ներկայացուցիչների պալատում նախապատրաստվող փաստաթուղթը հերթական փաստաթուղթ է, որը չնչին օգտակարություն կունենա հայկական կողմի համար՝ չունենալով որևէ գործուն ազդեցություն կամ նշանակություն»,- ամփոփեց Բորիս Առուշանյանը։
