Ադրբեջանի արարքն իսկական ահաբեկչություն է։ Մենք չէ, որ պետք է բացատրենք դա. ահաբեկչությունն այդ երկրի ողջ պատմության մեջ է, Azg.am-ի թղթակցի հետ զրույցում ասաց Արցախի Հանրապետության նախագահի խորհրդական, հատուկ հանձնարարություններով ներկայացուցիչ Դավիթ Բաբայանը՝ անդրադառնալով մարտի 5-ին «Խայփալու» կոչվող տեղանքում ադրբեջանական զինուժի դիվերսիոն խմբի հարձակման հետևանքով ՆԳՆ երեք աշխատակցի զոհվելու և մեկի՝ ծանր վիրավորվելու հանգամանքին։
«Ադրբեջանը պետական մակարդակով հայատյացություն և ահաբեկչություն է իրականացնում, ուրիշ ոչ մի բան։ Այս ամենը շարունակվելու է մինչև վերջ՝ մինչև վերջին հայը, մինչև Երևանը չվերցնեն։ Բայց մենք պետք է դիմադրենք»,- ասաց մեր զրուցակիցը։
Անդրադառնալով Հարավային Կովկասում ԵՄ հատուկ ներկայացուցիչ Տոյվո Կլաարի գնահատականին, որ տեղի ունեցած արյունալի միջադեպի համատեքստում ընդգծել է բանակցությունների առաջմղման խիստ անհրաժեշտությունը, Դավիթ Բաբայանը նկատեց՝ հայկական կողմը չպետք է հույսը դնի միջազգային հանրության հայտարարությունների վրա։
«Տեսնում ենք, որ ամեն ինչ ոչ թե արժեհամակարգերի վրա է հիմնված, այլ շահերի։ Հիմա Հաագայի դատարանը ևս որոշում է ընդունել՝ (նկատի ունի ՄԱԿ-ի արդարադատության միջազգային դատարանի պահանջն Ադրբեջանին՝ անհապաղ բացել Լաչինի միջանցքը՝ խմբ.) էլի հազարումի թերացումներով լի։ Բայց այդ որոշումն էլ Ադրբեջանը չի կատարում, դիվերսիոն հարձակումն այդ որոշման պատասխանն է»,- ասաց արցախցի պաշտոնյան։
Հարցին՝ եթե ոչ միջազգային հանրությունից, ապա գուցե ՀՀ իշխանությունների՞ց պետք է ակնկալիքներ ունենալ՝ ստեղծված իրավիճակում հնարավոր ամեն ձևով աջակցելու Արցախին, Դավիթ Բաբայանը պատասխանեց՝ հայկական կողմը պետք է ողջամիտ և իմաստուն լինի՝ երկկողմ հարաբերությունների միջոցով լուծելու իր քաղաքական շահերը։
Հետաքրքրվեցինք՝ իսկ ՀՀ իշխանությունների կողմից տեսնո՞ւմ է նման պատրաստակամություն.
«Միասնական պետք է փորձենք փրկել հայոց պետականությունը և հայ ժողովրդի ապագան. Արցախը չլինի, չի լինելու Հայաստանը, սա պետք է լավ հասկանանք»,- ասաց Բաբայանը։
Հաջորդ հարցին՝ ըստ իրեն՝ ՀՀ իշխաննությունները հասկանո՞ւմ են հարցի կարևորությունը, ԱՀ նախագահի խորհրդականը պատասխանեց՝ հայաստանաբնակներն ավելի լավ են հասկանում դա. իշխանությունն առանց ժողովրդի չի լինում, ավելին՝ իշխանությունը ժողովրդի արտացոլումն է, մեկը մյուսին չպետք է հակադրել։
Հիշեցնենք՝ մարտի 5-ին՝ առավոտյան ժամը 10։00-ի սահմաններում, ադրբեջանական զինուժի դիվերսիոն խումբը «Խայփալու» կոչվող տեղանքում թիրախավորել և կրակ է բացել ոստիկանության անձնագրային և վիզաների վարչության անձնակազմի հերթափոխի մեքենայի վրա։
Ահաբեկչության հետևանքով զոհվել է ոստիկանության 3 ծառայող.
Փոխգնդապետ՝ Արմեն Մայորի Բաբայան
Մայոր՝ Դավիթ Վալերիի Դանիելյան
Լեյտենանտ՝ Արարատ Թելմանի Գասպարյան:
Եվս մեկ ծառայող՝ լեյտենանտ Դավիթ Աշոտի Հովսեփյանը, ստացել է կրծքավանդակի հրազենային վիրավորում։
