Թուրքիայի հետ հարաբերություններ հաստատելուց առաջ պետք է մտածենք մեր անկախությունը  և ինքնիշխանությունը վերականգնելու մասին

33

Էրդողանի՝ Թուրքիայի նախագահ վերընտրվելով՝ Հայաստանի նկատմամբ Թուրքիայի և Ադրբեջանի վերաբերմունքն անփոփոխ կերպով կշարունակվի։ ՌԴ նախագահ Վլադիմիր Պուտինն էլ կկարողանա Էրդողանի միջոցով իրականացնել իր հայատյաց աշխարհաքաղաքական ծրագրերը, Azg.am-ի թղթակցի հետ զրույցում ասաց թուրքագետ Հակոբ Չաքրյանը։

«Միաժամանակ, թուրք ընդդիմադիր քաղաքական գործիչները բազմիցս նշել են, որ Թուրքիան չի կարող իր հարաբերությունները կառուցել միայն Պուտին-Էրդողան բարեկամության վրա, և եթե երկու երկրների հարաբերությունները պետք է զարգագանան, ապա՝պետական կառույցնեի փոխգործակցության միջոցով։ Բայց, ըստ նույն գործիչների, չպետք է մոռանալ հավասարակշռություն պահելու և Արևմուտքի մասին»,- ասաց թուրքագետը։

Հակոբ Չաքրյանը միաժամանակ համոզմունք հայտնեց՝ եթե անգամ Թուրքիայում իշխանության գային ընդդիմադիր ուժեր, դա դեռ չի նշանակում, որ Հայաստանի հետ միանշանակ պետք է դիվանագիտական հարաբերություններ հաստատվեին կամ հայ-թուրքական սահմանը շուտափույթ բացվեր։

«Մենք ինչո՞ւ ենք այդքան շահագրգիռ, որ Հայաստանի և Թուրքիայի միջև դիվանագիտական հարաբերություններ հաստատվեն։ Մենք կորցնելու ոչինչ չունենք։ Թուրքիայի հետ դիվանագիտական հարաբերություններ հաստատելու մասին մտածելուց առաջ  պետք է մտածենք մեր անկախությունը  և ինքնիշխանությունը, ինչպես նաև տարածքային ամբողջականությունը վերականգնելու մասին։ ՀՀ անկախությունն ու ինքնիշխանությունը խախատել է Պուտինն, իսկ տարածքային ամբողջականությունը՝ Ալիևը»,- ասաց թուրքագետը։

Հարցին՝ Էրդողանի վերարտադրման պարագայում ի՞նչ պետք է ակնկալել թուրք-ադրբեջանական տանդեմից՝ մեր զրուցակիցն ընդգծեց՝ Թուրքիայում վերջին շրջանում Իլհամ Ալիևը բուռն քննադատության է ենթարկվում։

«Նրանք համատեղ քաղաքականության ծրագիր են հրապարակել, որտեղ նշված է, որ Ադրբեջանի հետ հարաբերությունները պետք է կառուցվեն փոխվստահության սկզբունքի վրա, բայց ոչ թե երկու երկրենրի նախագահների, այլ պետական կառույցների միջև»,- ասաց Հակոբ Չաքրյանը։

Հիշեցնենք, որ Թուրքիայում նախագահական ընտրությունների երկրորդ փուլում երեկ հաղթանակ է տարել գործող նախագահ Ռեջեփ Թայիփ Էրդողանը։