Շարունակաբար խոսվում է այն մասին, որ ՔՊ-ական պարագլուխները տևական հանցագործություններ են գործում տարբեր աստիճանի, տարբեր որակների, և հիմա ժամանակն է, որ այդ հայտարարություններն իրավական դաշտ փոխանցվեն: Այս մասին, այսօր Գլխավոր դատախազության դիմաց բողոքի ակցիայի ժամանակ նշեց արցախյան երրորդ պատերազմում զոհված Վաչագան Մանուկյանի հայրը՝ բանաստեղծ Խաչիկ Մանուկյանը։
«Նախ, որպեսզի այդ հայտարարությունները մերկապարանոց չհնչեն, իրավական հիմք ունենան, և մենք հասկանանք՝ ընթացք տալի՞ս են այդ հանցանքներին: Մենք այդ հանցանքների գնահատականը պետք է կարողանանք ստանալ նաև մեր ժողովրդի պահանջով:
Ես իրատես եմ, ես գիտեմ, որ մեր ուզած սպասելիքը չի լինելու, որովհետև դատախազը բացահայտ հայտարարել է, որ ինքը զեկուցում է այսօրվա վարչապետին, այսինքն՝ նա կատարում է վարչապետի հրահանգները: Այսինքն՝ իրավական համակարգը գտնվում է իր ափի մեջ:
Հիմա մարդը ափը բաց է թողել, հեծանիվ քշելով է զբաղված։ Ես այստեղ շատ ազնիվ միտում եմ տեսնում: Դրանով նա ասում է՝ ես իրավիճակին չեմ տիրապետում, անցել եմ իմ սպորտաձևին»,- ասաց Խաչիկ Մանուկյանը:
Նա միաժամանակ շեշտեց՝ եթե նույնիսկ հիմա դատախազությունն ընթացք չտա իրենց դիմումներին, իրենք պարտավոր են իրավական դաշտ փոխանցել իրենց հայտարարությունները. «Ես գիտեմ, որ դարակազմիկ հանցագործների հետ գործ ունեմ, ես գիտեմ, որ իրավական գնահատականը լինելու է, լինելու է նաև քաղաքական գնահատական իշխանափոխությունից հետո: Այդ ժամանակ վստահորեն կասեմ, որ այո, արդարադատությունը հաղթելու է»:
Խաչիկ Մանուկյանն անդրադարձավ նաև ՌԴ արտգործնախարար Սերգեյ Լավրովի հայտարարություններին։
«Ինձ համար իր հայտարարությունները որևէ նշանակություն չունեն, ես նրան համարում եմ ժամկետանց քաղաքական գործիչ: Այն, որ պատերազմ եղավ իրենց երկու եղբայր պետությունների միջև, ես սա համարում եմ նաև իրենց դիվանագիտական պարտությունը: Նրա ասածն ինձ համար որևէ հիմք չէ»:
Հիշեցնենք, որ Կրեմլում Նիկոլ Փաշինյան-Վլադիմիր Պուտին հանդիպմանն ընդառաջ ՌԴ ԱԳ նախարար Սերգեյ Լավրովը հայ գործընկերոջ ու Ռուսաստանում Հայաստանի նորանաշնակ դեսպան Գուրգեն Արսենյանի հետ զրույցում քննարկել է երեխաների՝ շան պես քայլելու երևույթը, որն այժմ տարածված է։
«Ձեզ մոտ կա՞ն կվադրոբերներ։ Երեխաները շան դիմակ են հագնում։ Դա հիմա ամենագլխավոր նորություններից է։ Քայլում են ինչպես շունը»,-ասել է Լավրովը։
