«Բարգավաճ Հայաստան» կուսակցության ղեկավար Գագիկ Ծառուկյանը տարատեսակ իշխանափոխությունների և շարժումների մասնակցելու դառը փորձ ունի և իրավունք ունի կարծելու, որ որոշ հանգամանքներում իրեն գործող ռեժիմի հետ դեմ հանդիման մենակ են թողել։ Հետևապես մինչև նա հարյուր տոկոսանոց կամ գոնե հարյուր տոկոսին մոտ երաշխիքներ չունենա, որ «Տավուշը հանուն հայրենիքի» շարժումը կհաջողի, դրան չի միանա, Azg.am-ի թղթակցի հետ զրույցում վստահություն հայտնեց քաղաքագետ Արմեն Հովհաննիսյանը։
«Իր հաշվարկը զուտ էլեկտորալ է՝ պայքարել հաջորդ ընտրություններում այդ համոզմունքներին մոտ կանգնած էլեկտորատի ձայների համար։ «Բարգավաճ Հայաստանն» այդ ձայների համար պայքարելու է ընտրական շրջանում»,- ասաց մեր զրուցակիցը։
Հարցին՝ եթե ինչ-որ պահի Գագիկ Ծառուկյանն այնուամենայնիվ որոշի միանալ Բագրատ սրբազանի առաջնորդած շարժմանը, պայքարը դրանից կշահի՞, թե կտուժի, Արմեն Հովհաննիսյանը պատասխանեց՝ քաղաքական գործընթացներում նախկինները հիմա էլ առկա են, և դա դժվար է թաքցնել։
«Կարծում եմ՝ ՀՀ իշխանությունները շահարկում են այդ փաստը՝ շատ-շատերին դուրս պահելով բուն գործընթացներին մասնակցելուց։
Խնդիրն այն է, որ ԲՀԿ-ն կարող է միանալ շարժմանը՝ ոչ թե հաղթանակին նպաստելու համար, այլ՝ որպես այդ հաղթանակի համահեղինակ կամ շահառու դառնալու։ Այսինքն՝ դա կարող է տեղի ունենալ այն պահին, երբ առանց «Բարգավաճ Հայաստանի» էլ շարժման հաղթանակը լիովին ակնհայտ կլինի։ Իսկ այդպիսի հանգամանք ես դեռ չեմ տեսնում»,- ամփոփեց քաղաքագետը։
Հիշեցնենք՝ Բարգրատ սրբազանը հայտարարել էր, որ երեկ երեկոյան հանդիպել է Գագիկ Ծառուկյանին։ Հանդիպումը, ըստ Սրբազանի, կայացել է ԲՀԿ ղեկավարի տանը՝ ընտանեկան միջավայրում։
«Երկու կամ երեք օր առաջ էր, որ իր գրասենյակի միջոցով դիմել էինք, թե ինչ է հնարավոր անել Տավուշի և Լոռիի շրջանում մարդկանց կարիքները հոգալու համար։ Ուղղակի երեկոյան գնացինք այցի, որ հասկանանք, թե ինչ ծրագրեր են»,-ասել էր Սրբազանը։
Հարցին, թե քաղաքական հարցեր քննարկվե՞լ են՝ Տավուշի փեմի առաջնորդը պատասխանել էր. «Եթե խոսել էլ ենք՝ լավ ենք արել, բայց դրա մասին խոսակցություն չկար, որովհետև ընտանիքում էր խոսակցությունը՝ զավակներ, մայր, թոռ, հարս, այսինքն՝ մեծ ընտանեկան հանդիպում էր»։
«Բարգավաճ Հայաստան» կուսակցության ղեկավարի և Տավուշի թեմի առաջնորդի հանդիպման մասին ավելի վաղ հայտնել էր նաև կուսակցության մամուլի քարտուղար Իվետա Տոնոյանը։
Նա հերքել էր մամուլում տարածված տեղեկությունները, թե իբր Գագիկ Ծառուկյանը մերժել է Սրբազանի խնդրանքը՝ միանալ շարժմանը։
«Գագիկ Ծառուկյանն իրոք Բագրատ Սրբազանին հյուրընկալել է իր տանը, ընտանեկան միջավայրում՝ ընթրիքի սեղանի շուրջ։
Իսկ ինչպես հայտնի է, հայկական հյուրընկալության կանոնների համաձայն՝ ընտանեկան օջախում հյուրընկալության ժամանակ ընդունված չէ քննարկել աշխատանքային, առավել ևս՝ քաղաքական հարցեր»,-նշել էր Իվետա Տոնոյանը։
