Արցախում կատարվում է այն, ինչ նախապատրաստվել էր և իրականացվեց 2020 թվականի սեպտեմբերի 27-ին՝ սկզբում թեժ փուլ, որի ժամանակ Ռուսաստանն ու Ադրբեջանը Թուրքիայի քավորությամբ Արցախը կիսեցին, հետո՝ ավելի մեղմ փուլ, որի ընթացքում քայլ առ քայլ Արցախին զրկեցին սեփական պաշտպանության միջոցներից, այդ թվում՝ նաև Հայաստանի հնարավոր օգնությունից։ Azg.am-ի թղթակցի հետ զրույցում նման տեսակետ հայտնեց քաղաքագետ Ռոբերտ Ղևոնդյանը։
«Ի վերջո, Ռուսաստանն անպաշտպան, թուլացած և միայնակ մնացած Արցախը հանձնեց Ադրբեջանին։ Իրականում ես համաձայն չեմ, երբ ասում են՝ «Արցախն ընկավ», «Արցախը հանձնեցին»։ Արցախն ընկել էր արդեն 2020 թվականի 44-օրյա պատերազմի ընթացքում, բայց ուղիղ Ադրբեջանին չէր անցել. անցել էր սկզբում Ռուսաստանին, իսկ հետո Ռուսաստանը հանձնեց Ադրբեջանին»,- ասաց քաղաքագետը։
Ռոբերտ Ղևոնդյանի խոսքով՝ իր համար բացարձակապես միևնույն է՝ որ երկրի տարածքում է Արցախը, եթե Հայաստանի տարածքում չէ։
«Միակ անհանգստությունն այստեղ այնտեղ բնակվող հայերի ֆիզիկական անվտանգությունն է։ Դրա համար Հայաստանը պետք է ամեն ինչ անի, որպեսզի տարհանման հնարավորություններ ունենա։ Հայաստանը գոնե այսքանը պետք է անի։
Կարծում եմ՝ Ադրբեջանը դա մեզ վրա որոշակիորեն վաճառելով՝ այնուամենայնիվ հաճույքով կընդունի տարհանման հայկական առաջարկը, որովհետև շատ ավելի հեշտ և էժան է մարդկանց ուղղակի հեռացնել իրենց տներից և տարածքը վերցնել, քան արցախահայերին բնաջնջել, որովհետև դրանից հետո անհրաժեշտ է լինելու տարբեր հարթություններում դրա գինը վճարել»,- նշեց մեր զրուցակիցը։
Վերջում Ռոբերտ Ղևոնդյանը հավելեց՝ ինքը համաձայն է, որ չէր կարելի միջամտել Արցախում ընթացող պրոցեսներին, քանի որ դա կարող էր հնագեցնել շատ ավելի լուրջ պատերազմի՝ շատ ավելի վատ հետևանքներով։
Հիշեցնենք, որ ռուսական խաղաղապահ առաքելության հրամանատարության միջնորդությամբ պայմանավորվածություն է ձեռք բերվել ՌԴ խաղաղապահ զորախմբի տեղակայման գոտուց ՀՀ զինված ուժերի մնացած ստորաբաժանումների և զինծառայողների դուրսբերման և Լեռնային Ղարաբաղի Պաշտպանության բանակի ամբողջական լուծարման ու զինաթափման մասին։
Վաղը՝ սեպտեմբերի 21-ին, Եվլախում հանդիպում տեղի կունենա արցախահայության և Ադրբեջանի իշխանություների ներկայացուցիչների միջև։
