Հայասատանի Հանրապետության իշխանությունները պատրաստ են ցանկացած պայմանով ստորագրել փաստաթուղթ, որը կկոչվի խաղաղության պայմամանգիր։ Այդուամենայնիվ, կարծում եմ, որ խաղաղության պայմանագրի ստորագրումը Նոր տարուց հետո տեղի չի ունենա։ Azg.am-ի թղթակցի հետ զրույցում նման տեսակետ հայտնեց Կովկասի ինստիտուտի փորձագետ Հրանտ Միքայելյանը՝ անդրադառնալով «Коммерсантъ»-ի այն հրապարակմանը, որ Հայաստանն ու Ադրբեջանը ակտիվ աշխատում են խաղաղության պայմանագրի վրա, և այն կարող է ստորագրվել Ամանորից անմիջապես հետո։
«ՀՀ իշխանությունները վերջերս նույնիսկ հրաժարվեցին պահանջից, որ պայմանագրում կետ լինի Ադրբեջանի կողմից ՀՀ տարածքային ամբողջականության ճանաչման վերաբերյալ։ Ադրբեջանը մերժել է այդ կետը, և նույնիսկ այդ պարագայում փաստաթղթի ստորագրում տեղի չի ունենում։ Ինչո՞ւ. այստեղ երկու հանգամանք կա՝ Ադրբեջանը շարունակ մտածում է, թե էլ ինչ կարող է կորզել Հայաստանից, բացի այդ՝ բանավեճ կա ուժային կենտրոնների միջև, թե ով պետք է լինի գլխավոր միջնորդը»,- պարզաբանեց մեր զրուցակիցը։
Ըստ Հրանտ Միքայելյանի՝քանի որ ՀՀ իշխանությունները գործողությունների արդյունքում վիճելի բոլոր հարցերը լուծվում են Հայաստանի հաշվին, ապա այժմ բոլոր միջնորդները մրցում են, թե ինչ ավելի լավ պայմաններ առաջարկեն Ադրբեջանին։
«Այսպիսով, Ադրբեջանը դեռ դիտարկում է, թե ինչ լրացուցիչ հնարավորություններ կարող է ունենալ, այդ պատճառով էլ այդ երկրի նախագահը բոլորովին չի շտապում, ինչը չի կարելի ասել ՀՀ վարչապետի մասին։
Իհարկե, ես բանակցային սեղանից անմիջական տեղեկատվության չեմ տիրապետում, բայց չեմ տեսնում այնպիսի գործընթաց, որը կարող է մեկ-երկու շաբաթվա ընթացքում բերել խաղաղության պայմանագրի ստորագրման։ Էլ չեմ ասում, որ գործընթացները կարող են բավականին երկար ձգվել»,- ամփոփեց Կովկասի ինստիտուտի փորձագետը։
Հիշեցնենք, որ դեռ դեկտեմբերի սկզբին ԱԺ նախագահ Ալեն Սիմոնյանը լրագրողների հետ ճեպազրույցում հայտարարել էր՝ Հայաստանի և Ադրբեջանի միջև խաղաղության պայմանագիրը կարող է ստորագրվել մի քանի օրվա ընթացքում։
«Խաղաղության պայմանագիրը կարող է ստորագրվել 10 կամ 5 օրվա ընթացքում։ Մենք ուղարկել ենք մեր առաջարկները, սա արդեն 6-րդ փոխանակումն է։ Եթե Ադրբեջանը ոչինչ չփոխի, նոր առաջարկներ չանի․․․ մենք կարող ենք դա անել մի քանի օրվա ընթացքում»,- ասել էր Սիմոնյանը։
