Քրեակատորաղական հիմնարկներում ինքնավնասումների և ինքնասպանությունների դեպքերն առաջին հերթին հետևանք են մարդու իրավունքների ոտնահարման, այն բանի, թե թե ինչ պայմաններում են պահվում այդ անձինք, Azg.am-ի թղթակցի հետ զրույցում ասաց իրավապաշտպան Զարուհի Հովհաննիսյանը՝ անդրադառնալով ՀՀ արդարադատության նախարարության «Արթիկ» քրեակատարողական հիմնարկում այսօր առավոտյան գրանցված հերթական ինքնասպանության դեպքին։
«Հատկանշական է, որ բանտերում կալանավորված անձանց թիվը գերազանցում է դատապարտյալների թվին, և այս հանգամնաքը ևս ազդում է մարդկանց հոգեկան առողջության, կյանքի նկատմամբ նրանց վերաբերմունքի վրա։ Ինքնավնասումներն ու ինքնասպանություններն ի վերջո այն ճիչն են, որոնք անձի խնդիրների վրա ուշադրություն հրավիրելու և այդ խնդիրն առավել տեսանելի դարձնելու միտում ունեն։
Ինչ վերաբերում է բանտերում մարդու իրավունքների իրավիճակին, ապա այստեղ առաջին հերթին պետք է նշել ՔԿՀ-ներում քրեական ենթամշակույթի՝ այնուամենայնիվ չհաղթահարված խնդիրը։ Կան բազմաթիվ դեպքեր, երբ քրեական ենթամշակույթը լրջագույն ճնշումներ է գործադրում, մասնավորապես, սեռական հանցագործությունների դեպքերով ՔԿՀ-ներում հայտնված անձանց վրա՝ նրանց հանճախ հասցնելով ինքնասպանության»,- ասաց իրավապաշտպանը։
Ըստ Զարուհի Հովհաննիսյանի՝ ոչ պակաս կարևոր են ՔԿՀ-ներում գտնվող անձանց՝ ոչ պատշաճ մակարդակի բուժսպասարկումը, երբ առողջական լրջագույն խնդիրներով անձինք երկար ժամանակ մնում են անտեսված։ Սա հաճախ առիթ է հանդիսանում ինքնավնասումների և ինքնասպանության մտքերի։ Ոչ երկրորդական տեղում է նաև դատապարտյալների հոգեկան առողջության և հոգեբանական աջակցության խնդիրը։
«Հոգեբանական և բժշկական պատշաճ աջակցություն չտրամադրելու արդյունքում մենք ականատես ենք լինում ինքնավնասումների և ինքնասպանությունների դեպքերի ավելացման։ Իսկ դա ցույց է տալիս, որ համապատասխան օղակների կողմից պատշաճ աշխատանք չի կատարվում, և այն բոլոր գործիքները ներդրվել էին մարդու իրավունքների տեսանկյունից ավելի լավ պայմաններ առաջարկելու կամ խախտումները նվազագույնի հասցնելու համար, փաստացի արդյունավետ չեն գործում»,- եզրափակեց իրավապաշտպանը։
Հիշեցնենք, որ ըստ 168.am-ի՝ հերթական ողբերգական դեպքն է գրանցվել ՀՀ արդարադատության նախարարության «Արթիկ» քրեակատարողական հիմնարկում: Այսօր առավոտյան կախվելու միջոցով ինքնասպանություն է գործել հերթական ազատազրկված անձը:
Հատկանշական է, որ Ծովինար Թադևոսյանի՝ Քրեակատարողական ծառայության պետ նշանակվելուց ի վեր՝ 2.5 ամսում, սա ինքնասպանության 4-րդ դեպքն է քրեակատարողական հիմնարկներում: Նույն «Արթիկ» ՔԿՀ-ում ինքնասպանության դեպք էր գրանցվել նաև հունվարի 10-ին:
