Ես նման հարցի չեմ պատրաստվում այդ հարցին պատասխանել, որովհետև մեր դիրքորոշումը բազմիցս ասել ենք։ Թե հետագայում ինչ կլինի, ես կանխագուշակումներ չեմ անի, ուլտիմատումներով չեմ խոսի, այսօր ԱԺ-ում լրագրողների հետ զրույցում ասաց ԱԺ նախագահ Ալեն Սիմոնյանը՝ անդրադառնալով հարցին, թե բացառո՞ւմ է, որ ինչ-որ պահի Հայաստանը տեղի կտա ՀՀ Սահմանադրությունը փոխելու Ադրբեջանի պահանջին:
«Մենք դրա լուծումն էլ ենք առաջարկել, որն ակնհայտ է: Կարծում եմ՝ ոչ թե պետք է փորձենք մկաններով խաղալ կամ մեկս մյուսին բան ապացուցել, այլ որոշումներ և լուծումներ գտնենք»,-ասաց նա:
Խոսելով աԱդրբեջանական զորքերի՝ ՀՀ տարածքից հետ քաշվելու հավանականության մասին՝ ԱԺ նախագահն ասաց՝ խաղաղության պայմանագրի կետերը չի բացահայտելու։
«Բայց տրամաբանությունը հուշում է, որ երբ խոսում ենք սահմանն Ալմաթիի հռչակագրի սկզբունքներից ելնելով վերհանելու մասին, դա ենթադրում է, որ եթե Հայաստանը կամ Ադրբեջանը ճանաչում են, որ այս գծից այն կողմ այլ երկրի տարածք է, պետք է վերականգնի դա: Ես վստահ եմ, որ խաղաղության պայմանագրի կնքումով մենք դրան կհասնենք, և Ադրբեջանը հետ կքաշվի այն մասերից, որտեղ ինքն է առաջ, և մենք վեր կհանենք այն սահմանը, որով Հայաստանն անկախացել է սեպտեմբերի 21-ին»:
