Ինձ ընդհանրապես չի հետաքրքրում, թե ԲԴԽ-ն ինչ որոշում կկայացնի, պատրաստ եմ ամեն ելքի, բայց ուզում եմ ԲԴԽ-ն այնպիսի որոշում կայացնի, որը չի անդրադառնա մեր դատական համակարգի վրա, եւ որը հնարավորություն չի տա այսպիսի խայտառակ դատավարությունների։ Այս մասին այսօր՝ դեկտեմբերի 20-ին, ԲԴԽ-ում հայտարարեց Երեւանի ընդհանուր իրավասության դատարանի դատավոր Զարուհի Նախշքարյանը։
Նշենք, որ Բարձրագույն դատական խորհուրդը քննում է Երեւանի ընդհանուր իրավասության դատարանի դատավոր Զարուհի Նախշքարյանին կարգապահական պատասխանատվության ենթարկելու վերաբերյալ ՀՀ արդարադատության նախարարության միջնորդությունը։ Հանրային խորհրդի նախկին նախագահ Ստյոպա Սաֆարյանի հաղորդման հիման վրա է դատավորի նկատմամբ կարգապահական վարույթ հարուցվել։
Դատավորը նախ ներկայացրեց իր կողմից կայացված որոշման նախապատմությունը.
«Ներկայացվում է հայցադիմում, դրանում ներկայացված են 2 նախադասություններ որպես վիրավորական։ Հայցադիմումում նաեւ մեջբերվում է օրինակներ, բայց հայցադիմումի փաստական հիմքը բաղկացած է 2 ամբողջական նախադասություններից։ Հայցվորը նշել է որպես փաստական հիմք 2 ամբողջական արտահայտություններ, դրանից հետո ներկայացվել է պատասխան հարգարժան պարոն Սաֆարյանի կողմից, որը նույնպես արձագանքում է այդ երկու ամբողջական նախադասություններին, ոչ թե «լկտի» բառին առանձին վերցված, այլ վերլուծվում է նաեւ «ներխուժել» բառն իր հայցադիմումի պատասխանում։ Այնուհետեւ բաշխվում է ապացույցների պարտականություն, դատարան խնդրում է կողմերին՝ գրիչ եւ թուղթ վերցնեն եւ գրեն իրենց մոտ, որպեսզի հատուկ ուշադրություն դարձնեն ապացույցների ենթակա փաստերին։ Կողմերը նշում են իրենց մոտ ապացույցների պարտականությունը։ Ապացույցների բեռը բաշխվում է ամբողջական երկու նախադասություններով, ընդ որում, այդ երկու նախադասությունները դատարանը թելադրում է արձանագրության համար»։
Ըստ դատավորի՝ հնարավոր չէ ասել, թե ինքն ապացուցման բեռ չի բաշխել կամ բաշխել է այլ եղանակով.
«Պարզապես պետք է լսեք դատական նիստի արձանագրությունը։ Դատավարության կողմերը ապացուցման բեռից դժգոհություն չեն ներկայացրել։ Հակառակը պարոն Սաֆարյանն իր ֆեյսբուքյան էջում հռհռացել է այն գործողության վրա, որ դատարանը կոչում է ապացուցման բեռ, այնուհետեւ Վերաքննիչ բողոք է ներկայացվում։ Վերաքննիչ դատարանն անդրադառնում է ոչ թե նրա համար, որ ես դատավարական խախտում եմ թույլ տվել, այլ համարել է, որ «ներխուժել» բայի վերլուծությունը իրենից ներկայացնում է նյութական իրավունքի խախտում։ Վերաքննիչ դատարանը նույնպես չի համարում, որ ես դատավարական խախտում եմ թույլ տվել։ Այս պայմաններում հավաքվել ենք ԲԴԽ-ում եւ քննարկում ենք այս հարցը»։
News.am
