Ընդհանրապես, այս թեման մեր հանրությունում ունի չափազանց լղոզված եւ նենգափոխված ընկալում անգամ այն հանրային շերտերում, որոնք հստակ գնահատում են Նիկոլ Փաշինյանի քաղաքականության վտանգավորությունն ու դեմ են այդ քաղաքականությանը:
Այդ ամենով հանդերձ, նրանք դեմ են նաեւ այսպես ասած «նախկիններին», «Ռուսաստանի հետ կապ ունեցողներին», «նախկինների հետ կապ ունեցողներին»: ՄԻ խոսքով, առաջնորդվում են հետեւյալ տրամաբանությամբ՝ «սա վատն է, բայց ուրիշ ո՞վ»:
Հարգելիներս, քաղաքականության մեջ չկա «ուրիշ ով»-ի բանաձեւ: Որովհետեւ «ով»-ի պատասխանը միշտ տալիս է քաղաքականությունը՝ իր ներքին ու արտաքին բազմաֆունկցիոնալ շերտերով: Մինչ հասարակությունը փնտրում է «ուրիշ ով»-ի, քաղաքականությունը նրան մատուցում է այդ «ով»-ին, միշտ: Ավելին, հանրությանը դնելով այդ «ուրիշ ով»-ի փնտրտուքի ռեժիմում, քաղաքականությունը՝ իր ներքին ու արտաքին բազմաֆունկցիոնալ շերտերով, դրանց մեծ ու փոքր շահառուներով, դերակատարներով, առավել հանգիստ, անշտապ ու վստահ է հանրությանը կանգնեցնում իր «ով»-ի փաստի առաջ:
Հետեւաբար, այդ «ուրիշ ով»-ի թվացյալ ինտելեկտուալ կամ խորագետ հարցադրումը միշտ բախվում է քաղաքականության դրած փաստին, ու հանրությունը իրականում միշտ կանգնում է այդ փաստի առաջ:
Հետեւաբար, հանրային սուբյեկտությունն այստեղ ոչ թե «ով»-ի, այլ «ինչ»-ի որոնման հարցն է: Հանրությունը սուբյեկտության շանս ունի, երբ դնում է «ինչ»-ի հարցը, դրանով գոնե ստեղծելով նվազագույն միջավայր կամ պայման, որ «ով»-երը փորձեն ադապտացվել այդ «ինչ»-ին:
Ես այստեղ միտումնավոր չեմ շոշափում անուններ, չեմ տալիս անուններ, այլ խոսում եմ «բանաձեւերի» մասին: Դեպի անուններ ձեզ կողմնորոշում, հետեւաբար անուններով իրականում ապակողմնորոշում են քաղաքականության «մոդերատորները»: Դրան դիմակայելու միակ ձեւը դեպի «ինչ»-«ինչեր» գնալն է: Չափեք իրավիճակը այդպես: Մի ասեք, թե «ուրիշ ով», որովհետեւ իբրեւ թե ոչ մեկն էլ մի բան չէ, չկա ձեր «երազանքի» թեկնածուն:
Ասեք, թե «ինչ», ու չափեք իրականությունը «ինչ»-ով»: Հետո արդեն որոշեք, թե ո՞րն է այդ «ինչ»-ին գնալու, կամ գոնե մոտենալու, դեպի դա շարժվելու այդ պահի ամենաօպտիմալ ձեւն ու ճանապարհը, միջոցը: Այդ դեպքում դուք ձեզ համար գոնե կարող եք մոտենալ «ով»-ի առավել ստույգ սեփական պատասխանի:
Այդտեղ դուք ստանում եք որոշումների մասնակից լինելու շանս: Հակառակ պարագայում, միշտ որոշել են ու որոշելու են ձեր փոխարեն, իհարկե հայտարարելով, թե սիրում են ձեզ ու հպարտանում են ձեզանով:
Հակոբ Բադալյան, քաղաքական վերլուծաբան
