Հակակոռուպցիոն դատարանը՝ դատավոր Վահե Դոլմազյանի նախագահությամբ բավարարեց քննիչների բողոքը և 2 ամիս ժամկետով կալանավորեց «Սիներջի» ընկերության տնօրեն Աշոտ Հովհաննիսյանին:
Նշենք, որ դատարանում ավարտվել է նաև Ալեն Սիմոնյանի եղբոր կնոջ՝ Անի Գևորգյանի, կալանավորման միջնորդության քննությունը, սակայն ինչպես նրա և Էկոնոմիկայի փոխնախարար Անի Իսպիրյանի, այնպես էլ՝ գործով անցնող մյուս անձանց վերաբերյալ որոշում դեռևս չի հրապարակվել։
Ավելի վաղ հայտնի էր դարձել, որ էկոնոմիկայի նախարարությունում ձերբակալություններից հետո ձերբակալվել են նաև ՏՏ ամենահայտնի կազմակերպություններից մեկի` «Սիներջիի» մի խումբ աշխատակիցներ։
«Սիներջիի» հիմնադիր տնօրեն Աշոտ Հովհաննիսյանը երկքաղաքացի է՝ նաև ԱՄՆ քաղաքացիություն ունի։ Նա «Վիցե միսս Եվրոպա-2005» գեղեցկության մրցույթում հաղթած հաղորդավարուհի Լուսինե Թովմասյանի սկեսրայրն է։
Հիշեցնենք, որ այս գործով է անցնում նաև ԱԺ նախագահ Ալեն Սիմոնյանի եղբոր կինը՝ Անի Գևորգյանը։
Կազմակերպությունը համագործակցել է Էկոնոմիկայի նախարարության հետ, որտեղ էլ երեկ ձերբակալություններ ու խուզարկություններ էին ընթանում։
Ձերբակալվել է 7 անձ, այդ թվում էկոնոմիկայի փոխնախարար Անի Իսպիրյանը։
