Հակակոռուպցիոն կոմիտեի նախագահի թեկնածուների ընտրության համար ձևավորված խորհրդի նպատակն է մի քանի թեկնածուներից բաղկացած ցուցակ կազմել և այն ներկայացնել կառավարությանը, որպեսզի կառավարությունն այդ ցուցակից ընտրի ՀԿԿ նախագահին։ Այսօր տեղի ունեցած քննարկման ժամանակ այս մասին ասաց խորհրդի անդամ Դանիել Իոաննիսյանը՝ հիշեցնելով, որ մրցույթի առաջին փուլում դիմել էր ընդամենը մեկ թեկնածու՝ ԱԱԾ գլխավոր վարչության պետ Ռաֆայել Երիցյանը։ Նա, սակայն, բարեվարքության շեմը չէր հաղթահարել, և այդ պատճառով հայտարարվել էր մրցույթի երկրորդ փուլ։
«Երկրորդ փուլն ավելի մրցակցային էր. դիմել էր 5 թեկնածու։ Առաջ ընկնելով՝ ասեմ, որ նրանցից երեքը հաղթահարել են բարեվարքության շեմը և ներկայացվել են կառավարություն։ Գործադիրը նրանցից մեկին կնշանակի ՀԿԿ նախագահ։ Օրենքի համաձայն կառավարությունը կարող է և ոչ մեկին չնշանակել, և այդ դեպքում նորից մրցույթ կհայտարարվի։
Երեք թեկնածուներն են, մասնավորապես, Արթուր Նահապետյանը, Գևորգ Քոչարյանը և Պետրոս Մարտիրոսյանը։ Թեկնածուներից երեքն ունեին քննչական փորձ, չորսը՝ դատախազական, երկուսն աշխատել էին նաև մասնավոր ոլորտում, բոլոր հինգն ունեին պետական ոլորտում աշխատանքի փորձ»,- ներկայացրեց Իոաննիսյանը։
Հարցին՝ ի՞նչ չափանիշներով են գնահատել թեկնածուներին, բանախոսը նշեց՝ հիմնականում հաշվի է առնվել երեք բաղադրիչ՝ անձնական որակներ, բարեվարքություն և մասնագիտական գիտելիքներ, ընդ որում ՝գիտելիքները ստուգվել են հարցաթերթիկներին պատասխանելու միջոցով։
«Սկզբում հանրային ընկալում կար, որ ամեն ինչ կանխորոշված է, և շատերը հավատում էին, որ մրցակցության մեջ մտնելու իմաստ չկա։ Բայց ոչինչ էլ կանխորոշված չէ, և այժմ հինգ թեկնածուներից բավական լայն ընտրության հնարավորություն ունենք։ Իհարկե, այս պահին չեմ կարող ասել՝ կոնկրետ որ թեկնածուներն էին դրական կամ բացասական բարեվարքություն ստացել։
Մենք, ինչպես արդեն ասացի, վերջում որոշում ստորագրեցինք՝ երեք թեկնածուների ցուցակը ներկայացնելու կառավարություն, և ես հատուկ կարծիք ներկայացրեցի։ Հատուկ կարծիքում անդրադարձա մասնավորապես Պետրոս Մարտիրոսյանի բարեվարքության գնահատմանը։
Այսպես ասեմ՝ մի քիչ տարաձայնություններ ունեմ խորհրդի մյուս անդամների հետ, մեր գնահատականները բավականին տարբերվում են։ Իմ մոտեցումն այն էր, որ նրա բարեվարքությունն այնքան բարձր չէ, որքան կարծում եմ, որ պետք է լինի։ Օրինակ՝ քաղաքական չեզոքության մասով Պետրոս Մարտիրոսյանի ընկերը մի շարք հայտարարություններ է արել, որ «Թուրքական իշխանությանը պահող յուրաքանչյուր ոստիկան մի առանձին թուրք է»։ Ես չեմ պատկերացնում, որ ՀԿԿ նախագահը կարող է ունենալ ընկերներ, որոնք ոստիկանների մասին նման հայտարարություններ են անում։
Մյուս կողմից այս թեկնածուի ուժեղ կողմն այն է, որ նա տեսչական մարմինների հետ աշխատելու բավականին փորձ ունի։
Ինձ շատ դուր եկավ Արթուր Նահապետյանի բարեվարքությունը։ Պարոն Քոչարյանի ուժեղ կողմն էլ այն է, որ անգամ ամենաթեժ ժամկետներում չի վախեցել հետապնդում իրականացնել այնպիսի ազդեցիկ մարդկանց մասով, ինչպիսիք են Ռոբերտ Քոչարյանը, Սյունիքի նախկին մարզպետը և Սերժ Սարգսյանի եղբայրը»,- նշեց Դանիել Իոաննիսյանը։
Բանախոսը միաժամանակ նշեց՝ չի բացառում, որ առավելություն տրվի առավել բարձր միավորներ ունեցող թեկնածուին. իսկ ամենաբարձ միավորներն ստացել է Արթուր Նահապետյանը, երկրորդ տեղում Գևորգ Քոչարյանն է, երրորդում՝ Պետրոս Մարտիրոսյանը։
Վերջում Իոաննիսյանը շեշտեց՝ այնպես չէ, որ այս կամ այն մարմնի՝ ղեկավար չունենալը չի ազդում տվյալ մարմնի աշխատանքի վրա, ակնհայտ է, որ անկյունաքային հարցերով աշխատանքը թերի է կատարվում։
«Բայց ես համարում եմ, որ ավելի լավ է՝ պրոցեսը մեկուկես ամիս երկար տևի, կոնմիտեն ղեկավար չունենա, բայց վերջում լավ ղեկավար լինի։ Ես ասեմ՝ երեք թեկնածուներից որ մեկին էլ կառավարությունը նշանակի, յուրաքանչյուրն էլ էապես ավելի լավ ղեկավար կլինի, քան նախորդ թեկնածու Ռաֆայել Երիցյանը»,- ամփոփեց բանախոսը
Հիշեցնենք, որ երեկ կայացավ Հակակոռուպցիոն կոմիտեի նախագահի թեկնածուների ընտրության մրցույթ։ Կոռուպցիոն հանցագործությունները քննող կոմիտեի ղեկավարի թափուր պաշտոնի համար դիմում է ներկայացրել 5 անձ։ Հակակոռուպցիոն կոմիտեի ղեկավարի պաշտոնը թափուր է 2024 թվականի նոյեմբերից, երբ Նիկոլ Փաշինյանը sms-ի միջոցով կոմիտեի ղեկավար Սասուն Խաչատրյանին հորդորեց հրաժարական տալ։
