Եվրո-2020-ի D խմբի 2-րդ տուրում մրցեցին Խորվաթիայի և Չեխիայի հավաքականները։ Գլազգոյի «Համփեն Պարկ» ստադիոնում կայացած խաղն ավարտվեց ոչ-ոքի՝ 1։1։
Հանդիպման 34-րդ րոպեին Դեյան Լովրենը սեփական տուգանային հրապարակում օդային պայքար ծավալելիս հարվածել է Պատրիկ Շիկին։ Մրցավար Կարլոս դել Սերոն VAR համակարգով վերադիտելուց հետո 11-մետրանոց է նշանակել խորվաթների դարպասին։
Պատրիկ Շիկը դիպուկ է իրացրել 11-մետրանոցը՝ խփելով ընթացիկ Եվրոյի իր 3-րդ գոլը։
Երկրորդ խաղակեսի մեկնարկում խորվաթները հավասարեցրել են հաշիվը. 47-րդ րոպեին Իվան Պերիշիչը հուժկու հարվածով գրավել է Վացլիկի դարպասը։
Այսպիսով, Չեխիայի հավաքականը 4 միավորով բարձրանում է 1-ին հորիզոնական, իսկ Խորվաթիայի ընտրանին առաջին միավորն է վաստակում։
