ՌԴ նախագահի մամուլի քարտուղար Դմիտրի Պեսկովը, խոսելով Վլադիմիր Զելենսկու՝ կրակը 30 օրով դադարեցնելու առաջարկի մասին, նշել է, որ առանց բոլոր նրբությունների կարգավորման դա անհնար է։
Ապրիլի 28-ին հայտնի դարձավ, որ ՌԴ նախագահ Վլադիմիր Պուտինը հրադադար է հայտարարել Հայրենական մեծ պատերազմում Հաղթանակի 80-ամյակի առթիվ՝ մայիսի 7-ի լույս 8-ի կեսգիշերից մինչև մայիսի 10-ի լույս 11-ի կեսգիշերը։ Ի պատասխան՝ Վլադիմիր Զելենսկին առաջարկեց հրադադար առնվազն 30 օրով։
«Մենք տեսել ենք, բայց եթե խոսքը նման երկարատև դադարեցման մասին է, ապա այստեղ կարևոր են նրբությունները, որոնց մասին (ՌԴ) նախագահ Պուտինը խոսել է Կրեմլում: Դա ևս կարևոր է, բայց առանց այս հարցերի պատասխանի դժվար է գնալ նման երկարատև հրադադարի: Նախագահ Պուտինը խոսել է այս մասին, մենք պետք է ամեն անգամ հիշենք այդ խոսքերը», – լրագրողներին ասել է Պեսկովը:
Ռուսաստանը ռազմական գործողություն է սկսել Ուկրաինայում 2022 թվականի փետրվարի 24-ին։ Նախագահ Վլադիմիր Պուտինն այն անվանել է ի պաշտպանություն նրանց, որոնք Կիևի ռեժիմի կողմից 8 տարի շարունակ ենթարկվում են ծաղրուծանակի, ցեղասպանության: Դրա համար նախատեսվում է իրականացնել Ուկրաինայի ապառազմականացում և ապազգայնականացում, դատի տալ բոլոր ռազմական հանցագործներին, որոնք պատասխանատու են Դոնբասի խաղաղ բնակիչների դեմ արյունալի հանցագործությունների համար: Արևմուտքի երկրներն ի պատասխան լայնածավալ պատժամիջոցներ են սահմանել Ռուսաստանի դեմ։
