Առողջապահության ամբողջ բյուջեն 162 միլիարդ դրամ է։ Առողջության առաջնային պահպանման համար 2025 թվականին նույնքան գումար է հատկացվելու՝ 31 միլիրադ, 629 միլիոն դրամ, ինչպես 2024 թվականին։
«Հայաստան» խմբակցությունից Արմենուհի Կյուրեղյանը Առողջապահության նախարար Անահիտ Ավանեսյանին հարցրեց՝ եթե մենք ուզում ենք հիվանդությունների կանխարգելումը կարևորել, ոչ թե հետևանքները վերացնել՝ ավելի շատ ծախսեր անելով՝ ինչո՞ւ է առողջության առաջնային պահպանման համար նախատեսված բյուջեն նույնը մնացել, ոչ թե ավելացել։
«Մոր և մանկան առողջության պահպանման ծրագրի բյուջեն նույնպես նույնն է մնացել՝ 5 միլիարդ 311 միլիոն դրամ։ Օժանդակ տեխնոլոգիաներով երեխաներ ունենալու ծրագրի բյուջեն էլ է նույնը մնացել։ Ես ձեզ հարցում էի ուղարկել՝ ուսումնասիրություն արվո՞ւմ է, թե որոնք են մեր երկրում անպտղության պատճառները, ի՞նչ է արվում այդ պատճառները վերացնելու ուղղությամբ։ Պատասխան եմ ստացել՝ այդպիսի հետազոտություններ չեն կատարվում։ Ժամանակը չէ՞, որ այդպիսի հետազոտություններ կատարելու վրա գումար ծախսվի և անպտղության պատճառները հայտնաբերվեն ու դրանք վերացվեն, ոչ թե օժանդակ տեխնոլոգիաների միջոցով երեխա ունենալու վրա այդքան մեծ գումարներ ծախսվեն»,- 2025 թ. պետական բյուջեի նախնական քննարկման ժամանակ Անահիտ Ավանեսյանին հարցեր ուղղեց Արմենուհի Կյուրեղյանը։
2024 և 2025 թվականների բյուջեները նույնն են նաև թմրաբանական ծառայությունների ոլորտում։ Ամեն օր ահազանգվում է, որ մեր երկրում թմրանյութեր օգտագործողների թիվն ավելանում է։ Այդ համատեքստում 2025 թվականի բյուջեն ինչպե՞ս է նույնը մնացել։
Սոցիալապես անապահով խմբերի բուժօգնությունը 2025 թվականին նվազելու է։
«Մեր երկրում սոցիալապես անապահով ընտանիքների թիվը կամ բուժօգնության կարիք ունեցողների թի՞վն է նվազել։ Արցախահայությունը 2025 թվականին շարունակելո՞ւ է բժշկական օգնություն ստանալ, ծրագրերը պահպանվելո՞ւ են։ Բժշկական ապահովագրության համակարգը, որը պետք է ներդրվեր արդեն 2024 թվականից, պարզվում է, չի լինելու։ Սա ձեր հնգամյա ծրագիրն է, ձեր խոստումներ են։ 2023 թվականին նախագիծը պատրաստ էր, 2024 թվականից որոշակի խմբեր պետք է ապահովագրական փաթեթ ունենային, 2025 թվականից պետք է ներգրավվեին բոլոր թոշակառուները։ Եվ հնգամյա ծրագրի ավարտը պետք է լիներ 2025 թվականը, այնինչ 2025 թվականին այս ծրագրին չեք էլ անդրադառնում»,- Առողջապահության նախարարի առաջ խոստացած ու չիրականացրած ծրագրրեը դրեց Արմենուհի Կյուրեղյանը։
Այո՛, ձեր նշած բյուջեները պետք է ավելանային, բայց ընդհանուր բյուջեի չավելանալու պայմաններում դա հնարավոր չէր անել. պատասխանեց Անահիտ Ավանեսյանը։
Բռնի տեղահանված մեր հայրենակիցները շարունակելու են պետպատվերի շրջանակում ստանալ բուժօգնություն. հավելեց նախարարը։
«Մենք հնարավորինս շատ ջանք ենք թափում մանրակրկիտ ուսումնասիրելու բժշկական ապահովագրության ոլորտը, վերանայելու որակական չափորոշիչները, վերանայվում են լիցենզավորման պայմանները»,-բժշկական ապահովագրության թեմայով հարցերին այսպես պատասխանեց նախարար Ավանեսյանը։
