Գերմանիան ներողություն է խնդրել Ադրբեջանից արցախահայերի վերաբերյալ գրառում անելու, դրան կից Արցախի դրոշի նկարը տեղադրելու համար, ու հեռացրել է գրառումը. տեղեկանում ենք Գերմանիայի պետքարտուղար Դյորթե Դինգերի կողմից Ադրբեջանի նախագահի օգնական Հիքմեթ Հաջիևին ուղղված նամակից։
«Դաշնային նախագահի սոցիալական ցանցերում կարճ ժամանակով հրապարակվել են դրոշի սխալ նկար և ուղեկցող տեքստ։ Սխալը հայտնաբերելուց հետո համապատասխան հաղորդագրությունն անմիջապես ջնջվեց։ Գրառումը հրապարակվել է տեխնիկական սխալի արդյունքում և որևէ նշանակություն չունի Ադրբեջանի տարածքային ամբողջականության վերաբերյալ Գերմանիայի հայտնի դիրքորոշման շրջանակներում: Ես շատ վշտացած եմ տեղի ունեցած սխալից և կցանկանայի անկեղծ ներողություն խնդրել այդ հրապարակման համար»,– գրված է նամակում։
Ավելի վաղ հայտնել էինք, որ տարածաշրջանային այցով Երևանում գտնվող Գերմանիայի նախագահ Ֆրանկ-Վալտեր Շտայնմայերն սոցիալական ցանցերում լուսանկար է հրապարակել Արցախի դրոշով և անդրադարձել արցախահայության թեմային։ Հրապարակմանը կից տեքստում նախագահը նշել է, որ Լեռնային Ղարաբաղը բնակեցված էր հիմնականում հայերով։ Որոշ ժամանակ անց Ադրբեջանի ԱԳՆ է հրավիրվել այդ երկրի դեսպան Ռալֆ Հորլեմանը, որին «խիստ բողոք» են հայտնել Շտայնմայերի գրառման համար։
