Խորհրդարանական ընդդիմության միակ լավությունն այն կլինի, որ կասեցնի իշխանության՝ նոր վարկեր վերցնելու ծրագրերը

Կարծում եմ՝ Հայաստանը կառավարող ընտանիքի լոբի մաքրելու, ճաշ եփելու, հեծանիվ քշելու տիկտոկյան անմեղսունակ  տեսանյութերը ոչ մեկին ոչ շեղում են,  ոչ էլ հեռացնում այն թանձր ավտորիտարիզմի ընկալումից, որը կա մեր երկրում։

Ինչ-որ մ բռնապետի և նրա կնոջ  հեծանվային զբոսանքի համար մի քանի ժամով երկրի գլխավոր միջպետական ճանապարհը փակելու հրահանգն արդեն վկայում է, որ այս պարտված, մազից կախված երկրում կա շատ լուրջ, ամեն օր սաստկացող վտանգ։ Այս ամենը հիշեցնում է  իսպանացի ժողովրդի դահիճ կաուդիլիո Ֆրանկոյի կյանքն ու կառավարման վարքագիծը։

 Ֆրանկոյի օրոք Իսպանիայում չի եղել կոդիֆիկացված Սահմանադրություն, գործել են  միայն նրա  հրապարակած  օրենքները, որոնք ունեցել են սահմանադրական կարգավիճակ։ Պետության բոլոր նշանակալի պաշտոններին Ֆրանկոն նշանակել է նրանց, ովքեր իր հետ կապված են եղել  անձնական հավատարմագրային հարաբերություններով։

Ֆրանկիստական վերնախավի կարծիքով՝ ֆրանկիզմն իր լեգիտիմացումն ստացել է Քաղաքացիական պատերազմում տարած հաղթանակով, որը դիտարկվել է ոչ միայն որպես իր աշխարհայացքի հաղթանակ, այլև որպես իսպանական և եվրոպական քաղաքակրթության, մշակույթի պաշտպանություն։

Այսօրվա  քպ-ական Հայաստանում կեղծ հեղափոխական ջոջերի ցինիզմը ևս հիմնված է նրանց այս  համոզմունքի վրա՝ իրենք լեգիտիմացվել են նախկինների դեմ տարած հաղթանակով։

Վեց տարի անց  բոլորն են հասկացել արդեն, որ ոչ մի հաղթանակ էլ չի եղել,  եղել է իշխանափոխանցման հրահանգ, որը տվել է արևմուտքի ճնշման տակ կքած ՀՀ նախկին ղեկավարը։

Ակնհայտ է, որ քպ բռնապետը և նրան սատարող խմբակը ներկայումս կանգնած են լրջագույն խնդիրների առջև։ Անցնող տարիները փոշիացրել են խմբակի գաղափարազուրկ հիմքը. Մեծ  հաշվով չկա ասելիք, չկա զարգացման տրենդ, չկա միջազգային որևէ նախագծի անդամակցում, չկա գիտական, ուղեղային, տեխնոկրատ ընդգրկում։

Քպ խմբակը պարզապես ճոճվող նավակ է, որ լող է տալիս անգրագիտության, գաղափարազուրկ ունայնության, տոտալ մերժվածության   և տիկտոկյան էժանագին PR-ի սահմաններում։

 Ինչո՞վ է սա ավարտվելու:

 Պետք է կասեցնել դրանց նոր քայլերը՝ հատկապես արտաքին պարտքերի գեներացման իմաստով։

 ՀՀ ընդդիմադիր հատվածը պետք է ակտիվ կերպով ներգրավվի նոր վարկեր ստանալու գործընթացի կասեցմանը։ Արդեն իսկ 6 տարվա կրկնապատկված արտաքին պարտքի մակարդակը քպ ապիկարների թեթև ձեռքով շուտով ավելանալու է ևս կես միլիարդ դոլարով։ Պարտքի տակ կքած պետությունը կորցնում ինքնիշխանությունը, դառնում արտաքին կառավարման օբյեկտ։ Այս իմաստով մեծ անելիք ունի դեռևս խորհրդարանում գտնվող այսպես կոչված ընդդիմությունը, որի միակ լավությունն այս պահին կլինի բոլոր վարկային ծրագրերի տապալումը, քանի որ պարտք վերցրած ամեն դոլարը, եվրոն  մեր պետության վախճանին  են մոտեցնում։

Խորհրդարանական  ընդդիմությո՛ւն, եթե դժվարություններ կլինեն, մի՛ ամաչեք, դիմեք։ Անպայման կօգնենք։

Հրայր Կամենդատյան, տնտեսագետ