Խաղաղության պահանջը իմ պահանջն է, ոչ թե Ադրբեջանի, այսօրլրագրողների հետ զրույցում ասաց ԱԺ նախագահ Ալեն Սիմոնյանը։
Նա ընդգծեց՝ սահմանազատված և սահմանագծված սահմանի առկայությունը, ադրբեջանական գյուղերի վերադարձը և Հայաստանին հայկական գյուղի վերադարձն իր պահանջն է։
Ի պատասխան այն դիտարկման, որ ադրբեջանական զորքերը չեն լքում Հայաստանի տարածքը, Սիմոնյանը նշեց՝ իսկ Ադրբեջանի տարածքում հայկական զորքեր չկա՞ն:
«Սա վերաբերում է սահմանի այն հատվածներին, որոնք սահմանազատված չեն: Ոչ միայն անկլավը, շատ տեղերում նրանք են առաջ, շատ տեղերում մենք ենք առաջ: Նրանք վերահսկում են հայկական տարածքի 210 քառակուսի կիլոմետրը, իսկ մեր տարածքի տակ՝ ասենք՝ 110 քառակուսի կիլոմետրը: Օրինակ՝ Տավուշում»,- ասաց նա:
Միաժամանակ Սիմոնյանը նկատեց՝ ադրբեջանցիները շատ տեղերում անօրինականորեն են առաջ եկել։ Ըստ այդմ՝ Տավուշում այժմ աշխատանքներ են տարվում, իսկ Սյունիքի շատ հատվածնեչում արդեն սահմանապահներ են տեղակայված։
Սիմոնյանի խոսքով՝ մեծ տերությունների համար փոքր երկրները միշտ էլ եղել են առևտրային խաղաքարտեր և գործիք՝ իրենց ազդեցությունը տարածելու համար։ Նրա խոսքով՝ բոլոր գերտերությունները ձգտում են մեծացնել իրենց ազդեցությունը փոքր երկրների վրա, որոնք, իրենց հերթին, ձգտում են նվազեցնել այն։
«Մենք չպետք է շտապենք մեկ երկրի գիրկը նետվել, ապա մյուսի, քանի որ բոլոր արտաքին կենտրոններն ունեն իրենց շահերը», – ասաց ԱԺ խոսնակը։
Ալեն Սիմոնյանը վստահեցրեց՝ Հայաստանը ոչինչ չի արել և չի անում իր հարևանների, այդ թվում՝ Իրանի դեմ։
