Կատարվել է Շիրակի «Չոր նավահանգիստ» արդյունաբերական պարկ ծրագրի տեխնիկատնտեսական ուսումնասիրությունը և, ըստ էության, կարող ենք արձանագրել, որ Խաղաղության խաչմերուկ ծրագրի գործարկման և խաղաղության հաստատման պարագայում այս ծրագիրը խիստ իրագործելի է։ Այսօր տեղի ունեցած տարեկան ամփոփիչ ասուլիսի ժամանակ հայտարարեց Էկոնոմիկայի նախարար Գևորգ Պապոյանը։
«Այս պարագայում Շիրակի «Չոր նավահանգիստը» դառնալու է տարածաշրջանային տրանսպորտային լրջագույն հաբ, և մենք ոչ միայն մեր քաղաքական ուղերձների մեջ, այլ նաև գործի մեջ պատրաստվում ենք իրականացնել «Խաղաղության խաչմերուկը»։ Դա փաստացի միայն գաղափարախոսություն չէ, այլ կոնկրետ ծրագիր է, որը ենթադրում է Հյուիս-հարավ ճանապարհի գործարկում, որը մեծ թափով կառուցման մեջ է։ Երկրորդ փուլում ենթադրում է երկաթուղային ցանցի զարգացում»,-նշեց նախարարը։
Գևորգ Պապոյանը շեշտեց՝ ծրագրի իրականացման համար լրացուցիչ ներդրումները կկատարվեն՝ մոտ 50 մլն դոլար։
«Սա գործընթաց է, որը պետք է զուգակցվի «Խաղաղության խաչմերուկ» պրոցեսի հետ»,-ասաց նա։
Անդրադառնալով «Լիդիան Արմենիա»-ի թեմային՝ նախարարը հիշեցրեց, որ վերջերս կնքված պայմանագրով ընկերությունն իր բաժնետոմսերի 12,5 տոկոսը փոխանցեց ՀՀ կառավարությանը։
«Մենք պատվիրել էինք բարձր կարգի աուդիտ, որը ցույց տվեց՝ սա եկամտաբեր նախագիծ է։ Կարծում ենք՝ մոտ ապագայում ֆինանսավորման հարցերը կլուծվեն, և արդեն գարնանը կսկսենք շինարարական աշխատանքները, իսկ սեպտեմբեր-հոկտեմբերին՝ արդյունահանումը»,- ասաց Պապոյանը։
Հիշեցնենք, որ «Չոր նավահանգիստ» նախաձեռնության մասին հայտարարվել էր դեռ 2021 թվականին։ Այն պետք է ստեղծվեր Գյումրիում՝ «Շիրակ» օդանավակայանի մոտ, ունենալու էր չոր նավահանգստի գոտի և օդային գոտի։ Չոր նավահանգստի գոտին ներառելու էր մեծ պահեստ, որտեղ իրականացվելու էին համախմբված բեռնափոխադրումների ծառայություններ, տեղակայվելու էին նաև մաքսային բաժանմունքները, անձնակազմը և տերմինալի կառավարման թիմը: Իսկ օդային գոտում իրականացվելու էին օդային բեռնափոխադրումներ։
