Իսլամական հեղափոխության պահապանների կորպուսի (ԻՀՊԿ) հրամանատար, գեներալ-մայոր Մոհամմադ Պակպուրը զգուշացրել է Իսրայելի ռեժիմին, որ այն պետք է պատրաստվի ցավոտ ճակատագրի. գրոմ է Tasnim-ը։
«Հանցավոր և անօրինական սիոնիստական ռեժիմը կարժանանա դառը և ցավոտ ճակատագրի՝ հսկայական և կործանարար հետևանքներով», – ուրբաթ օրը Իսլամական հեղափոխության առաջնորդ այաթոլլահ Սեյեդ Ալի Խամենեիին ուղղված նամակում ասել է նա։
Գեներալ-մայոր Պակպուրը նշանակվել էր ԻՀՊԿ-ի հրամանատարի պաշտոնում՝ փոխարինելով գեներալ-մայոր Հոսեյն Սալամիին, որը սպանվել էր ուրբաթ վաղ առավոտյան իսրայելական ռազմական հարվածի հետևանքով։
Հարվածների հետևանքով զոհվել են նաև Իրանի զինված ուժերի շտաբի պետ, գեներալ-մայոր Բաքերին, Խաթամ ալ-Անբիա կենտրոնական շտաբի հրամանատար, գեներալ-մայոր Ղոլամ Ալի Ռաշիդը, ԻՀՊԿ-ի ավիատիեզերական ուժերի հրամանատար, բրիգադի գեներալ Ամիր Ալի Հաջիզադեն, առնվազն վեց իրանցի միջուկային գիտնականներ, ինչպես նաև խաղաղ բնակիչներ՝ կանայք և երեխաներ։
Իր նամակում գեներալ-մայոր Պակպուրը ցավակցություն է հայտնել կորուստների համար և ընդգծել նահատակների արյան վրեժը լուծելու իր հանձնառությունը։
«Իսլամական Հանրապետության ազգային ինքնիշխանությունն ու տարածքային ամբողջականությունը խախտող սիոնիստական ահաբեկչական ռեժիմի կողմից այսօր կատարված հանցագործությունը անպատասխան չի մնա», – հայտարարել է նա։
Աստծո օգնությամբ դժոխքի դարպասները շուտով կբացվեն այս մանկասպան ռեժիմի համար. շարունակել է ավագ հրամանատարը։
Այաթոլլահ Խամենեին զգուշացրել է սիոնիստական ռեժիմին, որ այն խիստ պատիժ կստանա՝ ասելով. «Այս հանցագործությամբ սիոնիստական ռեժիմն իր համար պատրաստել է դառը, ցավոտ ճակատագիր, որը նա անպայման կտեսնի»։
